Almaty mýzeıiniń bas qor saqtaýshysy Raýzııa Orynǵazyqyzynyń aıtýynsha, kelýshiler úshin mýzeıde saqtalǵan árbir jádigerdiń tarıhy qyzyqty. «Mýzeılik buıymdar kóbine qala turǵyndarynyń qorynan jınaqtalatyn bolsa, etnografııalyq ekspozısııa jeke tulǵalardan satyp alynǵan jádigerlermen tolyǵyp otyrady. Oǵan jyl saıyn memleketten arnaıy qarjy qarastyrylǵan. Kez kelgen jádigerdi satyp almastan buryn saraptamalyq negizdeme qorytyndysyna súıenip, baǵalaý komıssııasynyń nazaryna alynady. Eksponattardy baǵalaý kezinde naryqtaǵy quny saralanady. Kez kelgen ekspozısııa elimizdegi, sondaı-aq shetelderdegi kórme alańdarynda kórsetiletindikten, jádigerlerdi baǵalaý barysynda onyń tarıhı mazmunyna da asa mán beriledi», deıdi Raýzııa Orynǵazyqyzy.
Búginde etnografııalyq qorda shamamen 3 myńnan astam jádiger bar. Eń kóne jádigerler ishinde 1894 jyly tigilgen toı shymyldyǵy qyzyl qońyr tústi mataǵa qarmaq bizben aq, sary, qara, kók tústi jiptermen kestelengendigimen kóz tartady. Shymyldyq qoǵam qaıratkeri Medeý Pusyrmanulynyń týysy Baný Myrqasymovaǵa arnalǵan. Munymen qosa HH ǵasyrdyń basyna tıesili Qytaıdyń Altaı óńirinde qoldanylǵan kúmispen qaptalyp, altynmen shaıylǵan er-turman, osy kezeńge tıesili sırek kezdesetin zergerlik buıym – óńirjıek, qudaǵı júzik, taǵy da basqa jádigerler etnografııalyq qordyń ajaryn ashyp tur.
Ataqty batyrymyz Baýyrjan Momyshuly ustaǵan jazý mashınkasy, jazýshy Ázilhan Nurshaıyqovtyń jeke zattary, áıgili ánshi Roza Baǵlanovanyń sahnalyq kıimi, «Dos-Muqasan» ansambliniń aspaptary sııaqty jeke buıymdar týraly derekterdi mýzeıge kelýshiler qyzyǵa tyńdaıdy. Ásirese mýzeıge jıi keletin oqýshylar úshin ár jádigerdiń tarıhy tartymdy.
Sońǵy jyldary Almaty mýzeıi mamandary sheteldik kórmelerge qatysyp, ulttyq jádigerlerdi halyqaralyq keńistikke tanystyryp keledi. 2022 jyly Ońtústik Koreıa men Túrkııada, al byltyr Italııanyń Neapol, Aýstrııanyń Vena qalasynda ótken etnografııalyq jáne qazaqtyń ult aspaptary kórmesin uıymdastyrsa, mýzeı qyzmetkerleri ǵylymı jáne ǵylymı-praktıkalyq konferensııalarǵa qatysyp, Fransııanyń jetekshi mýzeılerinde kásibı biliktilikterin arttyryp qaıtty.
ALMATY
