Byltyr TÚRKSOI halyqaralyq uıymynyń sheshimimen qazaq rýhanııatynyń damýyna zor úles qosqan tuǵyrly tulǵanyń 125 jyldyǵyna oraı Temirbek Júrgenov jyly dep jarııalandy. Osyǵan oraı qoǵam qaıratkeriniń qurmetine jyl boıy túrli is-shara uıymdastyrdy. Sonyń jalǵasy retinde jazýshy Beıbit Qoıshybaevtyń «Komıssar Júrgenov» atty kitaby túrik tiline aýdarylsa, ǵalym Almajan О́teǵalıevanyń «Temırbek Jýrgenov: trıýmf ı tragedııa» atty eńbegi orys tilinde jaryqqa shyqty.
B.Qoıshybaevtyń túrik tilindegi «Komiser Jürgenov» atty romanynda halqymyzdyń birtýar perzentiniń ómir joly, ósken ortasy, el ıgiligi jolyndaǵy janqııarlyq eńbegi, qýǵyn-súrginge túsken qaıratker otbasynyń basynan ótken aýyr kezeńderi shynshyl jazylǵan. Sondaı-aq jazyqsyz jalanyń qurbany bolǵan ardaqty tulǵanyń jary Dámesh Ámirhanqyzy eriniń esimin qoǵam ómirine qaıtarý jolyndaǵy uzaq jyldar tynymsyz ter tókkeni shynaıy baıandalǵan.
Al ǵalym Almajan О́teǵalıevanyń «Temırbek Jýrgenov: trıýmf ı tragedııa» atty keń kólemdegi muraǵat derekterine súıenip jazylǵan monografııalyq eńbeginde kórnekti qaıratkerdiń qoǵamdyq-saıası qyzmeti barynsha ashylǵan.
Is-shara barysynda sóz alǵan Mádenıet jáne aqparat vıse-mınıstri Arman Júdebaev atalǵan mınıstrlik T.Júrgenov murasyn nasıhattaýdy únemi nazarda ustaıtynyn aıtty. Halyqaralyq TÚRKSOI uıymynyń bas hatshysy Sultan Raev mazmundy is-sharanyń mańyzyna toqtala kelip, «Byltyr ardaqty azamattyń 125 jyldyǵyn kúlli Túrki dúnıesi birigip toılady. Endi onyń ádebı-pýblısıstıkalyq murasyn túbegeıli zerttep, mádenıetimiz ben ádebıetimizdiń tarıhynda alatyn ornyn naqty belgileý– siz ben bizdiń jáne keleshek urpaqtyń moınyndaǵy paryz», dedi ol.
Tusaýkeserdi TÚRKSOI-dyń Qazaqstandaǵy mádenı ókili, akademık Kárimbek Qurmanálıev júrgizdi. Jıynda Parlament senatynyń depýtattary D.Qydyráli, R.Rústemov, ǵalymdar D.Qamzabekuly, A.Shárip, E.Tileshev, Á.Bákir, O.Álıev, temirbektanýshy S.Ańsatov t.b. sóılep, tulǵatanýdyń el birligi men memleketshildikke yqpalyn basa aıtty.
