1916 jyly 21 qazanda qazirgi Jangeldın aýdanynyń aýmaǵyndaǵy Tatyr kóliniń jaǵasynda Amangeldi bastaǵan kóterilisshiler men jazalaýshy otrıad arasynda qııan-keski urys bolady. Osy shaıqasta 21 jastaǵy Ǵapbas jazalaýshy otrıadtyń barlaýshysyn alyp uryp, eren erlik jasaıdy. Onyń kózsiz erligine rıza bolǵan bas sardar oǵan óziniń qanjaryn syılaǵan.
Bul jádiger 1863 jyly Zlatoýst qarý-jaraq zaýytynda jasalǵan. Bolattan daıyndalyp, saby jezden quıylǵan. Qanjardyń sabynda ázirlengen jyly men eki basty samuryq beınelengen tańba bar. Uzyndyǵy – 64 sm, júzi – 49 sm, saby – 15 sm. Júziniń eni – 4 sm. Qanjardyń jeke salmaǵy – 1030 gr. Qynymen birge – 1355 gr. Qynynyń túbindegi metall bóligi túsip qalǵan.
Bas sardar erligine tánti bolǵan Ǵapbas Salamatuly beıbit zaman ornaǵannan keıin týǵan elinde halyq soty, bolystyq keńestiń tóraǵasy sekildi qyzmet istegen. 1972 jyly Arqalyq qalasyndaǵy Dala ólkesi tarıhy mýzeıi ashylǵanda qarııa halyq batyry syıǵa tartqan qanjardy óz qolymen mýzeıge tapsyrǵan.
