Kollajdy jasaǵan – Záýresh SMAǴUL ,«EQ»
Jergilikti tutynýshylar ózgeriske eshbir negiz joq degen pikirde. Sebebi ótken jyldyń 1 qazanynda ǵana kompanııa ortalyqtandyrylǵan sýyq sýdyń tekshe metrin 96,52 teńgeden 155,96 teńgege kótergen. Arada jarty jyl ótpesten monopolıst halyqtan artyq paıda tabýdyń amalyna taǵy kiriskendeı.
«Pavlodar-Vodokanal» JShS dırektorynyń orynbasary Valerıı Fılıaevtiń sózinshe, tarıfti kóterýge elektr energııasy men otyn baǵasynyń qymbattaýy sebep bolǵan. Buǵan qosa aldaǵy ýaqytta ábden tozǵan sý qubyrlaryn aýystyrýǵa árekettenip kórmekshi.
– Aýyz sý tarıfin – 25, tehnıkalyq sýdy shamamen 62 paıyzǵa ulǵaıtýdy usynyp otyrmyz. Biz ótinimimizdi monopolııalardy retteý jónindegi óńirlik departamentke joldadyq. Qoldanystaǵy tarıfterimiz kásiporynnyń kidirissiz jumys istep turýy úshin qajet ekonomıkalyq shyǵyndardy jappaıdy. Qyzmet tólemderinen túsken qarajattyń nátıjesinde 2025 jyly sý kóteretin sorǵylardy jalǵastyratyn negizgi qubyrdy jańartyp, Nazarbaev kóshesinde kollektor salǵymyz keledi. Alǵashqy jobanyń quny – 1,5 mlrd teńge, ekinshisine 100 mln teńgeden asa ınvestısııa quıamyz, – deıdi aýyz sý mekemesiniń ókili.
Kásiporynnyń bul usynystary tutynýshylarǵa unap otyrǵan joq. «Ádildik joly» RQB Pavlodar oblystyq fılıalynyń jetekshisi Nurgúl Qaıyrdenovanyń dereginshe, sý arnasy jeke menshik kompanııa bolǵanyna qaramastan memleket qazynasynan jylma-jyl mıllıardtaǵan teńge tólenip otyrǵan kórinedi. Máselen, 2017-2023 jyldar aralyǵynda Pavlodardaǵy káriz júıesin jańǵyrtýǵa bıýdjetten 16 mlrd 79,8 mln teńge jumsalsa, aýyzsý júıesin jańartýǵa 2 mlrd 692 mln teńge baǵyttalǵan.
– Eger kommýnaldyq jelilerdi jańartýdy memleket óz jaýapkershiligine alyp otyrsa, tarıfti kóterýdiń qajeti qansha? Bul kompanııaǵa aýdıtorlyq jáne salyq tekseristeri júrgizilgeni týraly aqparat ta jetkiliksiz. Eger jelilerdiń barlyǵy memlekettiń esebinde tursa, bizdiń qala bıligi turǵyndarǵa aýyzsý jetkizý úshin nege «Pavlodar-Vodokanal» JShS-men shart jasasyp otyr? Memlekettiń qazynasynan bir, halyqtan eki asap otyrǵan monopolıstiń bul oılaǵany qısynsyz. Aýyzsý satýdy tabys kózine aınaldyryp, al qyzmet kórsetý shyǵyndaryn memleket pen halyqtyń moınyna artyp qoıý jaramaıdy, – deıdi belsendi.
Nurgúl Ámentaıqyzynyń pikirinshe, monopolıst halyqtyń aqshasyna jańadan sý qubyry men kollektor salyp, ony óziniń menshigi etip almaqshy. Odan da jospardaǵy jelilerdi bıýdjet qarajatyna salǵan tıimdi dep esepteıdi. Esesine ol nysandar kommýnaldyq balansta qalady ári tarıfter óspes edi.
Negizi úlken qalalardaǵy aýyzsý mekemeleri elimiz táýelsizdik alǵaly mańyzy zor strategııalyq nysan sanalatyny málim. О́kinishke qaraı, 2017 jyly Úkimettiń №933 qaýlysymen «Erekshe strategııalyq mańyzy bar, onyń ishinde jalǵa jáne senimgerlik basqarýǵa berilýi múmkin sý sharýashylyǵy qurylystarynyń tizbesi» bekitilip, saldarynan Pavlodardaǵy sýmen jabdyqtaýdy qamtamasyz etetin sý sharýashylyǵy qurylystary (cý jınaǵy qurylystary, sorǵy stansalary, tazartqysh sý qubyry qurylystary) senimgerlik jalǵa berilip ketken. Bul nysandardy paıdalanǵany úshin «Pavlodar-Vodokanal» bıýdjetke aı saıyn nebári 96 mln teńge arendalyq aqy tóleıdi. Tutynýshylardan túsetin ózge qarajat monopolıstiń qaltasyna quıylady.
– Bilýimshe, elimiz boıynsha mundaı senimgerlik basqarý Pavlodar men Shymkent qalalarynda ǵana saqtalyp tur. Monopolısterdiń oıynyn tyıýdyń ýaqyty jetti. Sý kodeksiniń 25-babynda sý qurylystary memleket qaraýynda bolýǵa tıis ekeni anyq jazylǵan. Alaıda bizdiń oblys talapty oryndamaı otyr. Buǵan qosa «Pavlodar-Vodokanal» qyzmetkerleri tozǵan jelilerdiń ornyna polıetılen qubyrlaryn salyp jatyr. Polıetılen qubyrlar, árıne, arzanǵa túsedi. Biraq zaqym kelse, ony jóndeý múmkin emes, tek aýystyrý kerek. О́rkenıetti memleketter álgindeı qubyrdy qabyldamaıdy. Olarda shoıyn jáne qorǵanysh qabaty bar bolat qubyrlar keńinen paıdalanylady, – deıdi N.Qaıyrdenova.
Atap óterligi, aýyzsý kásipornynyń quryltaıshysy Georg Shpeızerdiń ózi – búginde Germanııa eliniń azamaty. Osydan birneshe jyl buryn ol qazaq jerindegi bıznesin jergilikti qaltaly azamattar tartyp alaıyn dep jatyr dep shý kótergen. Sodan beri monopolısten joǵaryda atalǵan sý qurylystaryn memleket ıeligine qaıtar dep talap etýge eshkim bata almaı otyrǵan tárizdi.
PAVLODAR
