Foto: egemen.kz
Zańda 18 jasqa deıingi balalarǵa ulttyq qordyń tabysy teń bólinetini aıtylǵan. Osy oraıda bıyl kámelet jasyna tolǵan azamattar qordyń qarjysyna qol jetkize ala ma degen saýal týyndaıdy.
Bastapqy mejege saı 2024 jyly 18 jasqa tolǵan jetkinshekter qarjydan qur qalmaıdy. Al byltyr bul jasqa jetken azamattardyń esepshotyna Ulttyq qordan aqsha aýdarylmaıdy.
Resmı sanǵa súıensek qor tabysynyń 50 paıyzy eldegi 7 mıllıon balaǵa úlestiriledi. Onyń ishinde bıyl shekti jasqa tolatyn 300 balanyń esepshoty qor qarjysy esebinen bir ret qana tolyǵady.
Balalarǵa beriletin qarjy Biryńǵaı jınaqtaýshy zeınetaqy qorynda jınaqtalady. Osy mekeme mamandary bala qaıǵyly jaǵdaıǵa dýshar bolǵanda onyń esepshotyndaǵy aqsha kimge beriletinin aıtty.
«Bala qaıtys bolǵan jaǵdaıda zańmen anyqtalǵan muragerler BJZQ-ǵa tıisti qujattarmen júginedi, qaǵazdar qaralǵan soń muragerler bul maqsatty jınaqtardy ózderiniń banktik shottaryna ala alady, olarǵa aqshany belgili maqsatta ǵana paıdalaný kerek degen shekteý qoıylmaıdy», dedi «BJZQ» AQ basqarýshy dırektory Murat Sháripov.
Al jyldar boıy esepshotynda Ulttyq qordan bólingen qarjy jınalǵan bala aqshasyn eki maqsatta paıdalana alady.
- Turǵyn úı jaǵdaıyn jaqsartý;
- Oqý aqysyn tóleý.
18 jasqa tolǵanda shottaǵy qarajat 5-10 jyl boıy saqtalady. Osy ýaqyt aralyǵyndaǵy paıdalanylmaǵan qarajatty zeınetaqy shotyna aýdarý usynylady. Sondaı-aq azamattyq zańnamaǵa sáıkes is júzinde jınaqtalǵan qarajatty muragerlik boıynsha berý múmkindigi de qarastyrylǵan.
Aıta keteıik, baǵdarlama boıynsha alǵashqy tólemder aqpan aıynyń basynda balalardyń shotyna aýdaryla bastaıdy. Qarjylyq operasııalardy azamattarǵa arnalǵan elektrondyq úkimettiń nemese Biryńǵaı jınaqtaýshy zeınetaqy qorynyń saıtynda balanyń JSN terý arqyly tekserýge bolady.
