Álemdegi eń alyp krýızdik keme jolǵa shyqty

Laınerdi «Royal Caribbean» kompanııasy basqarady. Kemeniń jobasy 2016 jyly qazanda bastalǵan-tuǵyn. Al 2021 jyly «Meyer Turku» kompanııasy ony qurastyrý jumystaryna qyzý kiristi. Laı­ner­diń alyptyǵy sonshalyq, bıiktigi Eıfel munarasynan da úlken. Uzyndyǵy 365 metrge jetedi. Salystyrý úshin aıtsaq, bul – eń úlken úsh fýtbol alańyna teń.

«Icon of the Seas» muhıtta júzgen qala sekildi. Onyń 20 palýbasy bar. Shamamen, jeti myńǵa jýyq jolaýshy men ekıpaj múshesi syıa­dy. Salmaǵy 250 myń tonnadan asady. Álemge áıgili «Tıtanık» laınerinen bes ese úlken. Kemede jolaýshylar bos ýaqytyn kóńildi ótkizý úshin barlyq jaǵdaı jasalǵan. Máselen, «Kóńildi aral» dep atalatyn laınerlerde ornalasqan eń alyp akvapark bar. Sondaı-aq buǵan 17 metrlik sarqyramasyn qosyńyz.

«Royal Caribbean» kompanııasynyń prezıdenti Djeıson Lıbertıdiń aıtýynsha, «Icon of the Seas» – álemdegi eń alyp, keremet keme. Degenmen kompanııa aldaǵy jyldarda odan da úlken laınerler jasaýdy josparlap otyr. «Icon of the Seas» – osy serııa boıynsha qurastyrylǵan alǵashqysy. Osy oraıda, sarapshylar Florıdadan jolǵa shyqqan «teńiz qalasy» krýız týrızmine tyń serpin beretinin alǵa tartady. Munyń birneshe sebebi bar.

Birinshiden, krýız kemeler arqyly saparǵa shyǵyp, álem aralaýdyń qorshaǵan ortaǵa tıgizer zııany orasan. Máselen, taza ekologııany jaqtaıtyn uıymdar júrgizgen zertteýlerge súıensek, bir apta krýızde demalý kezinde bóli­netin parnıkti gazdar kólemi ushaqpen ba­ryp, qonaq úıde toqtaýǵa qaraǵanda segiz ese kóp. Sondyqtan krýızdik saıahatqa qyryn qaraı­tyndar jeterlik.

Ekinshiden, «Icon of the Seas» suıytylǵan gaz tutynady. «Royal Caribbean» kompanııasy laınerdiń osy ereksheligin alǵa tartyp, ony «eń taza otyn» dep sıpattady. Biraq buǵan kelispeıtinder bar. Halyqaralyq taza kólik keńesiniń teńiz baǵdarlamasynyń dırektory Braıan Komer mundaı otyndy paıdalanýdy kózboıaýshylyqqa balaıdy.

«Suıytylǵan gazdy tutynamyz degenge erekshe basymdyq beredi. Alaıda bir sapar kezinde jumsalatyn suıytylǵan gazdan bólinetin shyǵarylym qarapaıym teńiz kemeleri qoldanatyn otynnan bólinetin zııan­dy qaldyqtardan 70-80 paıyzǵa kóp. «Icon of the Seas»-de álemdegi eń úlken suıy­tylǵan gaz sısternalary ornatylǵan. Osylaısha, kózboıaýshylyqqa baryp otyr», deıdi B.Komer.

Sarapshy jalpy suıytylǵan gazdyń basqa teńiz kólikterinde qoldanylatyn otyn­dar­ǵa qaraǵanda kómirqyshqyl gazyn tórt ese az bóletinine kelisedi. Biraq krýızdegi suıytylǵan gaz «metannyń bólinýi» dep atalatyn erekshelikke baılanysty kóbirek qaldyq shyǵarady. Iаǵnı gaz janýdyń ornyna sol kúıinde aýaǵa taraıdy. О́zderińizge málim, metan kómirqyshqyl gazyna qaraǵanda qorshaǵan ortaǵa áldeqaıda zııandy. Máselen, atmosferadaǵy metan CO2-ge qaraǵanda 80 ese kóp jylýdy ustaıdy.

«Royal Caribbean» vıse-prezıdenti Nık Roýzdyń aıtýynsha, «Icon of the Seas» jobasy bastalǵanda suıytylǵan gaz keń kólem­de qoldanýǵa bolatyn otyn túri retin­de sa­nal­ǵan. «Biz ony keme dızaınyna ıkemdilik ornatýǵa kómektesetin ótpeli otyn dep sa­naımyz. Sonymen qatar naryq damyp, basqa da aýqymdy balamalar engizilgen kezde otyn­nyń ártúrli túrlerine ońaı beıimdelýge múmkindik beredi», deıdi N.Roýz.

Taǵy bir aıta keterligi, «Icon of the Seas» qoldanylǵan sýlardy tazartýǵa arnal­ǵan je­til­dirilgen tazartý júıesimen jab­dyq­tal­ǵan. Kemedegi tushy sýdyń 93 paıyzdan astamy sýdan lastaýshy zattardy ketiretin keri osmos júıesi arqyly bortta óndiriledi.