Jylda osy ýaqytta ózen-kólge baı Qostanaı oblysynda tabıǵat janashyrlary kól betinde muz burǵylap, sý astyna aýa jiberýge kirisip ketetin. Bıylǵy burǵylaý jumystary Zarechnyı aýylynyń mańyndaǵy shaǵyn kólden bastaldy. Mamandardyń aıtýynsha, qys mezgilinde muz qalyńdaǵan saıyn, balyqtarǵa ottegi jetpeı qalatyn kórinedi.
«Sodan jappaı qyrylyp qalýy múmkin. Osyǵan baılanysty balyq sharýashylyǵy ınspeksııasy, áýesqoı balyqshylar qaýiptiń aldyn alý is-sharalaryn ótkizýdi dástúrge aınaldyrǵan. Muzdy burǵylap, oıyq jasaımyz da, oǵan qamys baý salamyz. Osylaısha, sý astyna aýa jiberip, balyqty aman saqtap qalamyz. Buǵan qosa aerator sııaqty qondyrǵylardy da paıdalanyp jatyrmyz», deıdi Tabıǵı resýrstar jáne tabıǵat paıdalanýdy retteý basqarmasy Balyq, ańshylyq jáne erekshe qorǵalatyn tabıǵı aýmaqtar bóliminiń basshysy Amangeldi Ismaıylov.
Burǵy tesken oıyq bir túnde muz bolyp qatyp qalýy múmkin. Al oıyqqa otyrǵyzylǵan qamystyń túbi sýǵa malynyp turǵandyqtan ońaılyqpen qata qoımaıdy. Osylaısha, qýys ózek qamys sýǵa ottegi jiberip turatyn tútikshe qyzmetin atqarady.
Jalpy, oblys aýmaǵynda shamamen 8 myńnan asa sý aıdyny bar. Onyń 384-i jergilikti mańyzy bar balyq sharýashylyǵy aıdyndarynyń tizimine engizilgen. Búginde óńirde 173 kásipker 245 sý aıdynyn paıdalanyp otyr. О́zderine bekitilgen kóldiń tazalyǵy men sý astyndaǵy tirshiliktiń amandyǵy osy kásipkerlerdiń moınyna júktelgen.
Áýesqoı balyqshylar óńirdegi sý aıdyndarynda negizinen móńke, taban, shortan, alabuǵa, ońǵaq, tuqy balyq mekendeıtinin aıtady.
Qostanaı oblysy
