Aıta keteıik, bir, eki jáne úsh bala týǵan kezde birjolǵy járdemaqy 131 100 teńgeden 140 296 teńgege deıin, tórtinshi jáne odan da kóp balaǵa 217 350 teńgeden 232 596 teńgege deıin ulǵaıdy. I toptaǵy kembaǵal adamdarǵa beriletin járdemaqy 89 248 teńgeden 95 496 teńgege deıin, II toptaǵy járdemaqy – 71 398 teńgeden 76 397 teńgege deıin, III toptaǵy járdemaqy 48 681 teńgeden 52 089 teńgege deıin ósti. Buǵan qosa múgedektik jáne asyraýshysynan aıyrylý boıynsha memlekettik áleýmettik járdemaqylar 7%-ǵa kóbeıdi.
«Azamattarǵa arnalǵan úkimet» memlekettik korporasııasy» KeAQ Shyǵys Qazaqstan oblysy boıynsha fılıaly dırektorynyń orynbasary Aıjan Aǵybaevanyń aıtýynsha, oblysta 137 482 zeınetkerdiń zeınetaqysy artty.
– Oblys boıynsha 19 784 múgedektigi boıynsha járdemaqy alýshy azamatqa, 8 731 asyraýshysynan aıyrylý boıynsha járdemaqy alýshyǵa, 18 478 arnaýly memlekettik járdemaqy alýshyǵa, 1 755 bala 1,5 jasqa tolǵanǵa deıin onyń kútimi boıynsha járdemaqy alýshy azamattarǵa, sondaı-aq 7 973 kópbalaly otbasyna, «Altyn alqa», «Kúmis alqa» dárejesimen marapattalǵan kópbalaly 3 769 analardyń tólemi ósti, – dedi Aıjan Aǵybaeva.
Sondaı-aq memlekettik korporasııamen kórsetiletin 26 memlekettik qyzmet túrine elektrondy túrde onlaın ótinish berýge bolatynyn, ol úshin qyzmet alýshylardyń uıaly telefon nómirleri mindetti túrde mobıldi azamattar bazasyna (MAB) tirkelýi kerek ekenin jetkizdi.
– Bizdiń zeınetaqymyz jyl saıyn ósip keledi. Ýaqtyly alyp otyrmyz. О́zim – «Altyn alqa» ıegerimin. Bul úshin de qosymsha járdemaqy alamyn. Eń bastysy, aspanymyz tynysh bolsyn! – deıdi zeınetker Qadısha Ahmetova.
Shyǵys Qazaqstan oblysy
