Qazirgi elektrondy testileýde talapkerlerdiń jınaǵan upaılary testileý sońynda ekranǵa shyǵarylady. Sonda kórsetilgen qorytyndysymen kelispegen jaǵdaıda testilenýshi sol mezette apellıasııaǵa bere alady. Apellıasııaǵa berýge test nátıjelerindegi suraqtardyń mazmunyna nemese tehnıkalyq kemshilikterge qatysty máseleler sebep bolýy múmkin. Suraqtardyń mazmuny boıynsha apellıasııa testileý aıaqtalǵannan keıingi alǵashqy 30 mınýtta beriledi. Apellıasııa dáleldi túsiniktememen negizdelýi kerek. Al eger testilenýshi durys jaýapty tabýǵa kedergi keltiretin tapsyrma sharttarynda fragmenttiń (mátin, shema, syzbalar, kesteler) joqtyǵyn anyqtasa, tehnıkalyq sebepter boıynsha apellıasııaǵa berýi qajet.
Ulttyq testileý ortalyǵynyń dırektory Rýslan Emelbaev atalǵan máselege qatysty: «Apellıasııany tek qyzyq kórip nemese qosymsha upaılarǵa úmittenip, tıisti negizdemesiz berýge bolmaıtynyn atap ótken jón. Apellıasııa suraqtardyń nemese jaýaptardyń sáıkes kelmeýi, sondaı-aq tehnıkalyq sebepter boıynsha ǵana berilýi kerek. Apellıasııalyq suraqtardyń barlyǵyn Respýblıkalyq apellıasııalyq komıssııa 30 jumys kúni ishinde qaraıdy», dep túsinikteme berdi.
Testilenýshi sertıfıkatyn apellıasııalyq shaǵym týraly sheshim qabyldanǵannan keıin jeke kabınetinen kóre alady.
Eske sala keteıik, qańtar aıyndaǵy UBT bastalǵannan beri 53 myńnan asa adam test tapsyrdy. Onyń ishinde talapkerlerdiń 73,6%-y qazaq tilinde, 26,3%-y orys tilinde, 35 adam aǵylshyn tilinde testileýden ótti. Shekti upaıdy 73%-ǵa jýyq talapker jınady. Ortasha upaı 65-ti, eń joǵary upaı 134-ti qurady. Testke qatysýshylardyń basym bóligi «Matematıka-Fızıka» jáne «Bıologııa-Hımııa», «Matematıka-Informatıka» baǵytyn tańdaǵan. Eń az tańdalǵany «Hımııa-Fızıka» baǵyty bolyp tur.
Ortalyq basshysy R.Emelbaevtyń aıtýynsha, 63 ereje buzýshylyq anyqtalǵan. Onyń ishinde 43 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 20 adam shyǵarylyp, olardyń nátıjeleri joıyldy. Bógde tulǵalar bolǵan joq.
Aıtpaqshy, erekshe bilim berý qajettilikteri bar talapkerlerge de testileýdi ózge zamandastarymen birdeı tapsyrýǵa jaǵdaı jasalǵan. Mysaly, qańtardaǵy UBT-ny dál osyndaı 158 talapker tapsyrypty.
2024 jylǵy UBT aıaqtalǵannan keıin bıylǵy qazan aıynyń sońyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylatynyn atap ótken jón.
