Foto: vetandlife.ru
Atap aıtqanda, Úkimet rezervinen úıirli shegirtkelerdiń jappaı taralýynyń aldyn alýǵa, jaıylymdarǵa zııanyn tıgizbeýge, aýyl sharýashylyǵy daqyldaryn joıýyna, sondaı-aq kórshi memleketterdiń irgeles aýmaqtaryna kóshýine jol bermeý úshin olardyń taralýy múmkin barlyq boljamdy alańda tolyq kólemdi hımııalyq óńdeý jumystaryn júrgizý boıynsha shuǵyl shyǵyndarǵa 3,9 mlrd teńge bólindi.
Elimizde sońǵy jyldary úıirli shegirtkelerdiń taralý alańynyń ulǵaıǵany baıqalady: 2020 jyly – 514 myń ga, 2021 jyly – 626 myń ga, 2022 jyly – 975 myń ga. 2023 jyly taralý alańy 1 585 myń ga bolady dep boljanǵanymen, is júzinde 1 616 myń ga óńdeldi. 2023-2024 jyldarǵa shegirtkeniń jappaı taralýynyń 11 jyldyq sıkliniń údemeli kezi sáıkes keledi.
Bıyl respýblıkalyq bıýdjetten 1 270,6 myń ga alańdy óńdeýge 4,2 mlrd teńge bólingen edi. Alaıda, 2024 jyly naqtylanǵan jalpy boljam boıynsha úıirli shegirtkeniń taralý alańy ulǵaıyp, 2,5 mln ga qurady, bul ótken jylmen salystyrǵanda, shamamen 1 mln gektarǵa artyq.
Bólingen qosymsha qarajat 1,3 mln ga alańda zııankes úıirli shegirtkege qarsy hımııalyq óńdeý jumystaryn júrgizýge baǵyttalady.
Eske sala keteıik, Qazaqstan aýmaǵynda shegirtkeniń úıirli (azııalyq, ıtalııalyq jáne marokkolyq) jáne úıirli emes túrleri taralǵan. Pestısıdterdi satyp alý jáne olardy saqtaý, tasymaldaý jáne qoldaný qyzmetteri syndy úıirli shegirtkelerden qorǵaý is-sharalaryn uıymdastyrý respýblıkalyq bıýdjet qarajaty esebinen júzege asyrylady.
