Foto: vesti.kz
Jerlesterimizdiń arasynan eń jaqsy nátıjege 19 jastaǵy Mıhaıl Shaıdorov qol jetkizdi. Jastar arasyndaǵy álem birinshiliginiń kúmis júldegeri qos baǵdarlamanyń qorytyndysy boıynsha 244,80 upaı jıyp, 6-oryndy ıelendi. Dıas Jırenbaev (195,88 upaı) 16-oryn alsa, Rahat Bralın (177,89 upaı) 19-satyǵa taban tiredi. Al bas júldeni 20 jastaǵy Japonııanyń juldyzy, Beıjiń olımpıadasy (1 kúmis, 1 qola) men álem chempıonattarynyń (2 kúmis) eki dúrkin júldegeri Iýma Kagııama (307,58 upaı) oljalady. Onyń otandasy Sýn Sato (274,59 upaı) kúmis medaldy moınynda jarqyratsa, Ońtústik Koreıanyń ókili Chha Djýnhvan (272,95 upaı) qolaǵa qol sozdy. Sondaı-aq japonııalyq Sota Iаmamoto (263,43 upaı) men qytaılyq Boıan Szın (256,89) syndy saıypqyrandar úzdik bes mánerlep syrǵanaýshylardyń qataryna endi.
