Foto: gov.kz
Eske salaıyq, búgin Prezıdent Qasym-Jomart Toqaevtyń qatysýymen Parlament Májilisiniń plenarlyq otyrysy ótti.
Memleket basshysy Qasym-Jomart Toqaev bul kandıdatýrany áýeli «Amanat» partııasy usynǵanyn jáne atalǵan usynyspen keliskenin aıtty.
«Oljas Bektenov – tájirıbeli memlekettik qyzmetshi. Ony Qazaqstan ekonomıkasy jáne basqa da salalary boıynsha bilim mol, uıymdastyrý qabileti joǵary, tártipti, adal, eńbekqor azamat. Sondyqtan el ekonomıkasynyń aldynda turǵan maqsatty júzege asyrýǵa qabileti jetedi dep oılaımyn. Sizder kelisim bergen jaǵdaıda, Úkimettiń jańa quramy tabystaǵanymyzdy saqtaı otyryp, Qazaqstandy sapaly damý jolyna shyǵarý úshin bar kúsh-jigerin salady dep senemin. Erteń Úkimettiń keńeıtilgen jıyny ótedi. Sol kezde jańa quramnyń aldynda turǵan jańa mindetterge toqtalamyn. Endi usynylǵan kandıdatýra boıynsha pikirlerińizdi aıtyp, daýys berseńizder», dedi Prezıdent Qasym-Jomart Toqaev.
Plenarlyq otyrysta qoldanystaǵy zańnamaǵa sáıkes, usynylǵan kandıdatýrany Májilistegi partııalardyń fraksııalary talqylap, bir aýyzdan sheshim qabyldady.
Oljas Bektenov 1980 jyly Almaty qalasynda dúnıege kelgen. Eńbek jolyn 2002 jyly Almaty qalasy Ádilet basqarmasy bóliminiń bas mamany retinde bastaǵan.
2018-2019 jyldary – QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary.
2019-2022 jyldary – QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary.
2022 jyldyń aqpanynan 2023 jyldyń sáýirine deıin – Qazaqstan Respýblıkasynyń Sybaılas jemqorlyqqa qarsy is-qımyl agenttiginiń tóraǵasy.
2023 jyldyń 3 sáýirinde Memleket basshysynyń Jarlyǵymen Qazaqstan Respýblıkasy Prezıdenti Ákimshiliginiń basshysy boldy.
