Esirtki taratýshylardyń uıymdasqan toptary Petropavldyń da túkpir-túkpirine jaıylyp, qalada esirtki taratyp júrgeni belgili bolyp otyr. Oblystyq polısııanyń esirtki qylmysyna qarsy kúres basqarmasynyń jedel qyzmetkerleri birneshe aı boıy qylmystyq toptyń sońyna túsip, aqyry segiz múshesin marıhýana men gashıshtiń úlken partııasyn taratýǵa daıyndaý kezinde, qylmys ústinde ustaǵan.
Jedel izdestirý qyzmetkerleriniń birneshe aı boıy esirtki keletin kanaldardy jáne olardy taratatyn núktelerdi zertteýi nátıjesin berdi. Polıseılerdiń aıtýyna qaraǵanda, esirtki negizinen Astanadan keletin kórinedi. Demek olardy jasaıtyn núkteler elordada shoǵyrlanǵan. Oblystyq polısııa departamenti baspasóz qyzmetiniń ókili Igor Mersalovtyń aıtýyna qaraǵanda, ustalǵan osy segiz kúdiktiniń jeteýi Petropavl qalasynyń turǵyny, taǵy bireýi – olardyń basshysy jáne uıymdastyrýshysy 35 jastaǵy Astana qalasynyń turǵyny bolyp shyqqan. «Qylmystyq top múshelerin ustaý kezinde barlyǵy 49 kg 318 gramm esirtki zattary alyndy. Onyń 81,5 gramy – gashısh. Qazir segizdiń tórteýi qamaýda otyr, qalǵandary polısııanyń qaraýynda. Qazir barlyq tıisti tergeý isi men saraptama jasalyp, is sotqa ótkizýge daıyn», deıdi oblystyq polısııa departamenti esirtkige qarsy kúres basqarmasynyń basshysy, podpolkovnık Rýslan Saparov.
Aıta ketetin jaıt, ótken jyly jeltoqsan aıynda da Petropavlda bir esirtki taratýshy ustalǵan edi. Jedel aqparattar negizinde Naberejnyı kóshesiniń boıymen kele jatqan «Hyundai Elantra» kóligi toqtatylyp, teksergende jolaýshy oryndyǵynda otyrǵan 43 jastaǵy áıeldiń sómkesinen sıntetıkalyq esirtkige jatatyn «mefedronnyń» qaǵazǵa oralǵan 80 bólshegi tabylǵan. Tergeý barysynda onyń taratýǵa daıyndalǵan esirtki ekeni belgili bolǵan. Áıeldiń ózi Astana qalasynyń turǵyny bolyp shyqty. Petropavlda ýaqytsha turyp jatqan onyń páterin teksergende, taratýǵa ázirlenip, folga qaǵazyna bólshektep salynǵan jarty kılogramm esirtki shyqqan. Rýslan Saparovtyń aıtýynsha, bul is boıynsha qylmystyq is qozǵalǵan.
PETROPAVL
