Foto: polisia.kz
«5 aqpanda Astananyń tergeý ızolıatorynda jedel bólimniń qyzmetkerleri front-ofıs kabınetindegi beınebaqylaý arqyly qoǵamdyq qorǵaýshynyń uıaly telefondy, qulaqqapty, eki SIM-kartany jáne qýattaǵyshty sottalǵanǵa berý faktisin anyqtady. Sol kúni Mańǵystaý oblysy boıynsha QAJD №77 mekemesinde qyzmetkerler qoǵamdyq qorǵaýshyny teksergen kezde aıaq kıiminen telefon men SIM-kartany tapty. Er adam tergeý qamaýyna alynǵan týysyna «tyıym salynǵan zatty» berýdi josparlaǵan. Mobıldi qurylǵylar men basqa da zattar tárkilendi. Qoǵamdyq qorǵaýshylarǵa qatysty ákimshilik materıaldar jasaldy. Sondaı-aq sottalǵandardy tártiptik jaýapkershilikke tartý úshin materıaldar toltyryldy. Qylmystyq-atqarý júıesi mekemelerinde ustalatyn adamdarǵa tyıym salynǵan zattar men buıymdardy bergeni úshin eskertý nemese 10 AEK mólsherinde aıyppul túrinde ákimshilik jaýapkershilik kózdelgenin atap ótken jón. Sonymen qatar qylmystyq-prosestik zańnamaǵa sáıkes tergeýshi «qoǵamdyq qorǵaýshy» mártebesin alý týraly qaýlynyń kúshin joıýǵa quqyly», delingen aqparatta.
