Joldar jabylǵaly túrli jol ýchaskelerinde 5 myńnan asa tehnıkanyń qozǵalysy toqtatylǵan. Odan bólek, baqylaý-ótkizý pýnktterindegi tehnıkany azaıtý maqsatynda Kólik mınıstrliginiń jol tehnıkasy men bólimshelerdiń kúshimen 27 avtokolonna uıymdastyrylyp, 4 myńnan astam kólikti dittegen jerine jol bastap, jetkizgen.
Tipti aldyn ala telefonǵa aýa raıynyń kúrt buzylatynyn, joldar jabylatynyn aıtyp, kúnine birneshe márte habarlama joldaıdy. Sonyń ózin kózine ilmegen júrgizýshiler kóbeımese, azaımaı tur.
– Turǵyndardy eskertý maqsatynda aýa raıynyń nasharlaýy jáne joldardaǵy kólik qozǵalysynyń shektelýi týraly qystyń alǵashqy eki aıynda 80 habarlama mıllıonnan asa abonentke jetti. Al «Darmen» mobıldi qosymshasy arqyly tótenshe jaǵdaılardyń aldyn alý týraly 47 aqparat jarııalandy. Oblystaǵy 13 radıostansada halyqty habardar etý úshin 21 ret habarlandyrý berildi, – deıdi oblystyń tótenshe jaǵdaılar departamenti basshysynyń orynbasary, polkovnık Aqylbek Ahmetjanov.
Mundaı jaǵdaıda jol ýchaskelerine jumyldyrylatyn arnaıy tehnıka da, kúshtik qurylym qyzmetkerleri de kóp. Byltyr 29 jeltoqsandaǵy aqtútek boranda 908 adam men 505 tehnıka tartylǵan. Tótenshe jaǵdaılar kúshteri, jol polısııasy jáne jol uıymdarynyń kúshimen 66 avarııalyq-qutqarý, 9 izdestirý-qutqarý jumystary kezinde 259 adam qutqaryldy. Qutqarylǵan 259 adamnyń 36-cy – bala.
«Úsh myńǵa tarta adam – qar qursaýynan, 121 tehnıka dreıften shyǵaryldy. Jergilikti bılikpen birlese otyryp, 1 324 adam, onyń ishinde, 150 bala jylytý ortalyqtaryna ornalastyryldy», deıdi Aqylbek Qosmanuly.
Jalpy, oblysta respýblıkalyq mańyzy bar jol – 1 853,5 shaqyrym. Osynyń ishinde jóndeý jumystary júrgizilip jatqany men qaıta jańǵyrtýdan ótip jatqanyn qospaǵanda 1 444 shaqyrym. Osy bir aralyqtaǵy joldy qardan tazalaıtyn, kútip-baptaıtyn kompanııa – «KAJservıs» jaýapkershiligi shekteýli seriktestigi.
«QazAvtoJol» UK» AQ Qaraǵandy oblystyq fılıalynyń dırektory Erlan Jumaǵulovtyń aıtýynsha, kompanııa bıyldyń ózinde jańadan 29 qar jınaý tehnıkasyn satyp alǵan.
– Jaı kúnderi – 50-60 tehnıka, al tótenshe jaǵdaılarda, aýa raıy nasharlaǵanda 100-ge tarta kólik jolǵa shyǵady. Mundaı kúnderi qyzmetkerler demalmastan, eki aýysymda jumys isteıdi, – deıdi Erlan Jumaǵulov.
Jol jaıly sóz qozǵala ketse boldy, jolaýshylardyń deni «QazAvtoJol» UK» AQ-ǵa degen narazylyǵy baryn aıtady. «Respýblıkalyq mańyzy bar joldarǵa ýaqtyly qum nemese tuz sebilmeıdi» degen syn jıi aldan shyǵady. Buǵan fılıal basshysy Erlan Jumaǵululynyń aıtar óz ýáji bar. Aıtýynsha, qum men tuz qospasyn sebýdiń de klımattyq tártibi bar. «Klımat jaǵdaıyna keletin bolsa, osy qospa turaqty túrde sebiledi», deıdi ol.
Aýa raıynyń qolaısyzdyǵyna baılanysty joldardy jabý bir ǵana organnyń quzyrynda emes. Oblystyń polısııa departamentiniń jergilikti polısııa qyzmeti basqarmasy basshysynyń orynbasary Baýyrjan Hantemirov «QazAvtoJol» UK» AQ, tótenshe jaǵdaılar qyzmeti jáne oblystyń polısııa departamentiniń ózara kelisimi arqyly júrgiziledi.
– Byltyr jeltoqsannyń sońy men bıyl qańtar aıynyń basynda qar qalyń jaýdy. Astana qalasyna barar jolda qalǵan 4 myńǵa tarta kólikti jetkizdik. Turǵyndar jolǵa shyǵar aldynda óz qaýipsizdikteri úshin habarlamalarǵa mán berip, kólikterin saılap shyqqany durys, – deıdi Baýyrjan Andaqululy.
Qala ishindegi aýa raıy jaqsy eken dep, sońynda jarty jolda qalatyndar bar. Kún raıynyń ahýalyn ańdamaı, jolǵa shyǵý óte qaýipti.
– Turǵyndar qala syrtyndaǵy aýa raıynyń qandaı ekenin bilmeıdi. Jol jabý – kezdeısoq qabyldana salatyn sheshim emes. Jol boıynda patrýlde júrgen qyzmetkerler jaǵdaıdy bizge beıne jáne fotomaterıaldar arqyly jiberedi. Sony basshylyqqa ala otyryp, joldy jabý sheshimi qabyldanady. Al turǵyndardyń qaýipsizdigi úshin keıingi kezde radıohabarlardy toqtatyp qoıyp, joldyń jabylǵany týraly habarlandyrý beremiz. Al polısııa qyzmetkerleri óte kúrdeli jaǵdaıda jandaryn shúberekke túıip, aqtútek boranda ilesip júrip, kólikterdi qaýipsiz jerge jetkizedi. Ony bireý bilse, bireý bilmeı jatady, – deıdi Aqylbek Ahmetjanov.
Túptep kelgende, quzyrly organ ókilderi jol-kólik oqıǵalaryn azaıtý maqsatynda qajetti is-sharalardy uıymdastyryp otyr. «Jol qozǵalysyna kelgende árkimniń ishki tártibi bolýy qajet», deıdi quqyq qorǵaý organynyń qyzmetkerleri. Siz ózińizben qosa, jaqyndaryńyzdyń da, jolaýshylaryńyzdyń da amandyǵyna tikeleı jaýaptysyz. Sondyqtan tártipke baǵyný – amandyqtyń alǵashqy qadamy.
Qaraǵandy oblysy
