Foto: stan.kz
Aýdandyq tótenshe jaǵdaılar bóliminiń habarlaýynsha, Qyzylkesik aýylynyń turǵyndarynan – 50, tótenshe jaǵdaılar bóliminen – 11 adam, 2 motopompa, 2 tehnıka jumyldyrylǵan. Sondaı-aq 200 qap ınertti materıaldarmen sý jaıylǵan aýmaqtardy bekitý jumystary júrgizildi. Aýyl ákimi О́. Mazenovtiń aıtýynsha, keshe túnde jaǵdaı tolyqtaı turaqtalǵan, baspanalar sý basý qaýpinen aman.
Sonymen birge, Qaraǵandy–Aıagóz–Boǵas avtojolynyń boıyndaǵy Jińishke ýchaskesiniń 3 tusynan qar sýy aǵyp ótken. Abyroı bolǵanda, «Qazavtojolǵa» qarasty DEÝ-31 mekemesi mamandary men tehnıkalarynyń der kezinde atqarǵan jumystarynyń nátıjesinde kólik qatynasy jedel rettelgen. Oıshilik–Aqsýat–Qumkól baǵytyndaǵy jol qatynasy da ádettegideı qalypty jaǵdaıda júrip jatyr.
Oıshilik aýyldyq okrýginiń Kókkemer qystaýyna da erigen qar sýy kirgen. Mundaǵy bes úıdiń ekeýi bókterde ornalasqandyqtan jaǵdaıyna alańdaýshylyq bolmaǵanymen, bir úıdiń aýlasy, qorasy sý astynda qalǵan. Jergilikti atqarýshy bıliktiń uıymdastyrýymen 2 tehnıka jiberilip, Kókkemerdegi bir áıel adam der kezinde Oıshilik aýylyna ornalastyryldy.
Oıshilik aýylynda qarǵyn sý dambaǵa tirelip, aýyldyń shyǵys jáne batys jaǵymen ekige bólinip tası aqqan. Sol jerdegi 1 úıdiń aýlasyna, 3 úıdiń qora-jaıyna sý kirgenimen, adamdaryna qaýip tóngen joq. Ol jerde 2 júk tıegish, 2 MAZ kóligi, 3 traktor, 15 adam jumyldyrylyp, daıyndalǵan ınertti materıaldardy tógip, bógetti qomdaý jumystary júrgizilip jatyr.
– Qarǵyn sý bizdiń úıdiń janynan aǵyp óte shyqty. Aýdandaǵy tótenshe jaǵdaılar bóliminen tıisti kómek der kezinde keldi. Aýyl bolyp uıymdastyrý jumystaryna bárimiz de qatystyq. Áıteýir búgin qar jaýyp, aıaz túsip, sý jaıylysynyń ári qaraı ketýi der kezinde toqtady. Malymyz din aman, – deıdi Oıshilik aýylynyń turǵyny Rýslan Qanapıev.
Qazirgi ýaqytta erigen qar sýynyń kólemi azaıdy, qaýip seıildi.
Abaı oblysy
