Aýǵanstandaǵy soǵys ardagerleri men múgedekterin úılestirý keńesiniń tóraǵasy Murat Ábdishúkirov 22 296 otandasymyzdyń Aýǵan soǵysyna qatysqanyn, 929 adam qaza taýyp, 19 adam habar-osharsyz ketip, myńdaǵan azamat múgedek bolyp oralǵanyn atap ótti. Bes otandasymyzǵa Keńes Odaǵynyń Batyry, bireýine Halyq qaharmany ataǵy berilse, eki jaýynger «Aıbyn» ordenimen marapattalǵan.
«Almaty ákimdigi ardagerlerdi udaıy qoldaıdy. 15 aqpan qarsańynda jáne 9 mamyrǵa qaraı ınternasıonalıst jaýyngerler 100 myń teńgeden alady. Aýǵan soǵysynyń ardagerleri medısınalyq kórsetkishteri boıynsha sanatorıı-kýrorttyq em alýǵa quqyly. Qazir kvota jylyna 170 joldamaǵa deıin ulǵaıtyldy. Munyń bári bizge sol soǵys týraly, jerlesterimizdiń erligin umytýǵa quqyq bermeıdi. О́z batyrlaryn qurmetteıtin jáne maqtan tutatyn halyq – uly halyq», deıdi M.Ábdishúkirov.
Ataýly kún qarsańynda Almatyda birqatar aýqymdy is-shara ótpek. Atap aıtsaq, 15 aqpan kúni 28 gvardııashy-panfılovshylar saıabaǵynda Aýǵanstanda qaza tapqan almatylyqtardy eske alý maqsatynda «Máńgilik alaý» monýmentine gúl shoqtaryn qoıý rásimi ótedi. Qalanyń barlyq aýdanynda ınternasıonalıst jaýyngerlerge qurmet kórsetilip, áskerı qoıan-qoltyq urys sheberleriniń kórme qoıylymdary men áskerı-patrıottyq konserti uıymdastyrylmaq. Al 14 aqpanda Ortalyq memlekettik mýzeıde mereıtoılyq kúnge arnalǵan kórme ashylady.
«Kók baıraq» qoǵamdyq birlestiginiń tóraǵasy Áýez Beısenbaev, ótkiziletin is-sharalar jas urpaqty tarıhpen tanystyrý úshin qajet ekenin atap ótti. Sonymen qatar Almaty qalasynyń barlyq oqý ornynda jastardyń boıynda patrıotızm sezimin oıatý maqsatynda «Erlik sabaqtary» ótkiziledi. Uıymdastyrýshylar qala turǵyndary men qonaqtaryn is-sharalarǵa belsene qatysýǵa shaqyrdy.
ALMATY
