Qarsylastaryn qamyrsha ıledi

Polısııa qyzmetkeri Nur­sultan Jaqypov eki jyldan beri kıkboksıngten Qazaqstan qu­rama komandasynyń múshesi bolyp keledi. Maǵjan Jumabaev aýdanynyń týmasy Nursultan Jaqypov kıkboksıngpen alty ja­synan beri aınalysqan. Keıingi jyldarda ol sheberligin Petropavl qalasynda Ádil Nur­ja­ýy­povtyń jetekshiligimen jalǵastyryp, qazir elimizdiń qurama komandasynda jattyǵady. Qapsaǵaı boıly qara jigit rıngte baıaǵynyń batyrlarynsha oı­qastaıdy. Onyń dál tıgizgen soq­qylarynan ushyp ketip jatqan qarsylastaryn kórgende aıyzyń qanyp otyrady. Byltyr ol Qazaqstan qurama komandasynyń sa­pynda Taılandta ótken Azııa birin­shiliginde chempıon boldy. Bang­kokte bolǵan osy chem­pıonatqa 22 eldiń sportshylary qatysqan. Sonyń ishinde Nursul­tan úsh jekpe-jek ótkizip, qar­sylastarynyń bárin tize búktirdi.

Fınalǵa shyqqan qarsylasy ırandyq kıkboksshyny Nur­sultan alǵashqy raýndtyń ózin­de eki ret nokdaýnǵa jiberip, ekinshi raýndta nokaýtqa túsirdi. Qazaqstan quramasy barlyǵy 21 medal alyp, Azııada birinshi oryndy enshiledi.

Sol jolǵy sapardan jeńispen oralǵan ony Soltústik Qazaqstan polısııa departamentiniń bastyǵy Aıdyn Qabuldınov qabyldap, syı-qurmet kórsetken. Biraq bizdiń Soltústikte ataqty sportshylardy qoldaý elimizdiń basqa óńirlerine qaraǵanda únemi kem­shin bolyp keledi. 30-ǵa kelgen Nur­sultan Jaqypovtyń áli kúnge aǵa leıtenant qana bolyp júrgeni de sonyń aıǵaǵy. Eli­mizdiń atyn aıdaı álemge tanytyp júrgen úzdik sportshylarǵa tartynshaqtamaı, jaqsy qoldaý jasaý kerek qoı.

Jalpy, Qazaqstan quramasy kıkboksıngten álemniń úzdik komandalarynyń birine jatady. Byltyr bizdiń qurama Portý­galııanyń Albýfeıre qalasynda 70 elden 573 sportshy qatysqan Álem birinshiliginde 22 marapat alǵan edi. Onyń beseýi – altyn, be­seýi – kúmis jáne 12-si – qola medal.

Soltústik Qazaqstan oblysy