Tabıǵat erkesin aıamaǵandar jazalanady

Ashtyqtan jandary qysylǵan elikter adamzattan osylaı kómek alyp jatyr. Qazir olar qary taza­lanǵan joldyń jıegine batyl basyp kelip, jıektegi qardy teýip tamaqtaryn tabýǵa tyrysyp júr. Osyny kórgende ashtyqtan jany qysylyp, 30-jyldardaǵy bosyp ketken qazaqtar kózińe elesteıdi. Tamaq úshin olar da osylaı jan saýǵalady-aý...

Osyny túsingen jandar kózi jáý­diregen, tabıǵattyń sulý ańyna qoldan kelgen kómekterin berýge tyrysyp jatyr. Biraq adamnyń bári sanaly emes, ań kórse, ata ja­ýyn kórgendeı julqynatyn bireýler beıbaq janýarlardy qyrýǵa áýes. Ondaılar tipti qazir ashatuıaqty ań­dardy aýlaýǵa tıym salynǵanyna da qaramaıdy.

Aqpan aıynyń basynan beri polısııa qyzmetkerleri orman jáne ań­shylyq sharýashylyqtarynyń ju­mys­shylarymen birlesip, «Bra­koner» jedel-profılaktıkalyq is-sha­rasyn ótkizip jatyr. Olar 7 kún ishinde 91 quqyq buzýshylyqty anyq­tady, onyń ishinde 62-si – ań­shylyq, 21-i – balyq aýlaý qaǵı­dalaryn buzýshylyqtar. Arasynda Aıyrtaý aýdanynyń bir turǵyny da bar. Polısııa qyzmetkeri onyń júrisinen sekem alyp, Burlyq orman sharýashylyǵy men Qaratal aýy­lynyń ortasynda toqtatqan. Kúdik tegin bolmaǵan, álginiń kóliginen 16 kalıbrli tirkelmegen «TOZ» myltyǵy men tórt oq tabylǵan. О́zi osy mańda otyn daıyndaıtyn kásiporynda jumys isteıtinin aıtqan. Turǵylyqty jerine kelgende onyń birneshe elikti jaıratyp, etin bólshektep qoıǵany belgili boldy. Jazyqsyz janýarlardy qyrǵan miskin qamaýǵa alyndy. Endi ol sottyń sheshimimen ómiri tappaǵan aqshasyn aıyppul retinde tóleıtini belgili.

Osyndaı soraqylyq Shal aqyn aýdanyndaǵy Sergeev orman sharýa­shylyǵynyń mańynan da shyqty. Qar ústinde zymyraıtyn «Býran» motoshanasynyń ústindegi 59 jáne 26 jastaǵy eki azamat ta birneshe elikti atyp tastaǵan. Motoshana­nyń ıesi osy aýdandaǵy aýyzsýmen jab­dyqtaıtyn kásiporyn eken, al myna ekeýi sonyń jumysshylary bolyp shyqty. Olardan alynǵan 9 patrony bar «IJ-18» myltyǵy da esh jerde tirkelmegen.

Oblystyq PD Jergilikti polısııa qyzmeti basqarmasy bastyǵy­­nyń orynbasary Aleksandr Rozbah­­tyń aıtýyna qaraǵanda, osy eki oqı­ǵa da sotqa deıingi tergeý tizili­mine engizilgen.

Soltústik Qazaqstan oblysy