Oǵan Aýǵan soǵysynyń ardagerleri – zapastaǵy maıor Aıdar Manasov pen aǵa praporshık Rahmanqul Abdykarımov bastaǵan jaýyngerler qatysty.
«Búgin Aýǵan soǵysynda qaza tapqan jaýyngerlerimiz ben ardagerlerimizdiń erligin eske alýǵa jınalyp turmyz. Sol sum soǵystyń aıaqtalǵanyna bıyl 35 jyl tolyp otyr. Olardyń kóbi búginde ortamyzda joq, qarýlastarymyzdyń keıbiri odan keıin de túrli sebeptermen ómirden ótti. Aýǵanstan jerindegi maıdan biz úshin de el tarıhynda eleýli oryn alatyn oqıǵalardyń biri. Oǵan qatysqan bozdaqtarymyzdyń jasaǵan erligi árqashan jadymyzda», dedi 36803 áskerı bólim komandıriniń orynbasary, podpolkovnık Bekbolat Sultanbaev.
Jınalǵan áskerı qyzmetshiler men otbasy músheleri eskertkish aldyna gúl shoqtaryn qoıyp, erlikpen qaza tapqan jaýyngerlerdi bir mınýttyq únsizdikpen eske aldy. Osy kúndi jáne qarýlas dostaryn eske alýǵa kelgen Aýǵan soǵysynyń ardagerleri óskelen urpaqqa erlikke taǵzym jasaǵany úshin alǵys bildirdi.
Tarıh paraǵyna kóz júgirter bolsaq, 1979 jyly Keńes áskerleriniń qataryndaǵy sarbazdar ınternasıonaldyq boryshyn óteý úshin Aýǵan jerine atanǵan edi. On jylǵa sozylǵan sol bir ádiletsiz soǵysta qazaq dalasynan attanǵan 22 myńǵa jýyq azamat Aýǵanstanǵa baryp, onyń qatarynda 900 sarbaz qaza tapsa, 20-y habar-osharsyz ketken edi.
Al qazirgi kúnderi Semeı qalasynda 400-ge jýyq sol bir surapyl kúnderdiń kózi tiri kýágerleri bar.
