Ekonomıka • 15 Aqpan, 2024

Altyn-valıýta rezervi molaıdy

266 ret

kórsetildi

3 mın

oqý úshin

Ulttyq bank tóraǵasynyń orynbasary Aqyljan Baımaǵambetovtiń aıtýynsha, elimizde iskerlik belsendilik ındeksi ótken aıda 49,7 belgisine deıin jaqsardy. Qyzmetter sektoryndaǵy kórsetkish – 50,6, óndiriste – 50,5-ti qurap, oń aımaqta turaqtady. Bıznes-klımat ındeksi de oń qalpynda qaldy. Oǵan kásiporyndardyń bolashaq bıznes jaǵdaılary boıynsha kútýleriniń jaqsarýy yqpal etip otyr.

Abaı AIMAǴAMBET

«Qańtar aıynda jyldyq ınflıasııa 9,5%-ǵa deıin baıaýlady. 2023 jyldyń qorytyndysy boıynsha, ınflıasııanyń tómendeýi bıylǵy qańtar aıynda bazalyq mólsherlemeni tómendetýge múmkindik berdi. Ol qańtarda 50 bazalyq tarmaqqa 15,25%-ǵa deıin tómendetildi. Al jyldyq ınflıasııanyń tómendeý qarqyny baıaýlap keledi. Qańtar aıyndaǵy aılyq ınflıasııa aldyńǵy ortasha mánderden joǵary qalyptasty. Qalyptasqan ınflıasııalyq ahýal dezınflıasııalyq saıasattyń jalǵasýyn talap etedi», dedi Aqyljan Baımaǵambetov.

Qańtar aıynda teńge baǵamynyń 1 AQSh dollary úshin 448,17 teńgege deıin, 1,4%-ǵa nyǵaıǵanyn da atap ótti. Jyl basynan Ulttyq qordan respýblıkalyq bıýdjetke transfertterdi qamtamasyz etý úshin valıýta satýdyń teńgege edáýir qoldaý kórsetkenin de jetkizdi.

«Onyń kólemi 1 mlrd-tan astam dollardy qurady. Jyl basynan memlekettik baǵaly qaǵazdar naryǵyna beırezıdentterdiń kapıtal aǵyny 194 mln dollar boldy. Ulttyq qordan valıýta satý kóleminiń ósýine jáne satý kóleminiń teńge baǵamynyń konıýnktýrasyna áser etýine baılanysty salymshylar múddesi úshin «Biryńǵaı jınaqtaýshy zeınetaqy qorynyń» zeınetaqy aktıvterin ınvestısııalaýǵa belsendi túrde valıýta satyp alý týraly sheshim qabyldandy. Osyǵan oraı aqpan aıynda BJZQ-ǵa valıýta satyp alý kólemi 200 mln dollardan 400-500 mln dollarǵa deıin ulǵaıdy», dedi.

Taǵy bir jaqsy jańalyq – Ulttyq banktiń altyn-valıýta rezervteri jyl basynan beri 36,7 mlrd dollarǵa deıin, 1,9%-ǵa ulǵaıǵan.

«Ulttyq banktiń valıýtalyq shottarynda ekinshi deńgeıli bankterdiń qarajatynan mol qaldyq qalǵan edi, bul soǵan baılanysty. Ulttyq qordyń aktıvteri jyl basynan 1%-ǵa tómendep, 59,4 mlrd dollar boldy. Bul tómendeý «Ulttyq qor – balalarǵa» baǵdarlamasy boıynsha mindettemelerdi esepteýge baılanysty. Degenmen qańtar aıyndaǵy ınvestısııalyq tabys 18 bazalyq tarmaqty nemese 0,11 mlrd dollardy qurady. Qańtar aıynda Ulttyq qorǵa túsken qarajat 472 mlrd teńge bolsa, onyń ishinde 31 mlrd teńge ulttyq valıýtada. Ulttyq qordan respýblıkalyq bıýdjetke beriletin transfertter kólemi 600 mlrd teńge», dedi UB tóraǵasynyń orynbasary.