Kollajdy jasaǵan – Qonysbaı ShEJIMBAI, «EQ»
«Qazaqstannyń joǵary sapaly emıtentteriniń jaı aksııalaryn satyp alý BJZQ zeınetaqy aktıvteriniń ınvestısııalyq portfelin ártaraptandyrýǵa baǵyttaldy jáne uzaqmerzimdi perspektıvada onyń kirisin arttyrýǵa yqpal etedi. BJZQ zeınetaqy aktıvterin «Air Astana» AQ-nyń jaı aksııalaryna ınvestısııalaý týraly sheshim turaqty qarjylyq kórsetkishterge, sondaı-aq bolashaqta turaqty dıvıdendter tóleýge múmkindik beretin kompanııa qyzmetiniń joǵary rentabeldiligine negizdeldi. Osy ınvestısııalar is júzinde BJZQ salymshylaryna Ortalyq Azııanyń avıasııalyq naryǵyndaǵy kóshbasshylardyń birine aksıoner bolýǵa múmkindik beredi», dep málimdeıdi Ulttyq bank.
Zeınetaqy aktıvterin basqarý nátıjeleri týraly málimetter aı saıyn BJZQ saıtynda jarııalanyp otyrady.
Jalpy, IPO bastalǵaly beri bırjalardaǵy suranys usynystan asyp túsken. Aıta keteıik, «Air Astana» toby – aksııalary bir mezgilde úsh bırjada (LSE, KASE men AIH) ornalastyrǵan alǵashqy qazaqstandyq kompanııa. Jarııa ornalastyrý aıasynda aksııa satýshy úsh tarap: «Samuryq-Qazyna» AQ, BAE Systems PLC jáne kompanııanyń ózi 370 mln dollar qarjy tartypty. Sóıtip, «Air Astana» 15 aqpan kúni IPO-ny aıaqtady.
Jeke ınvestorlardan túsken ótinimderdiń 97,8 paıyzy maquldanǵan. IPO barysynda kompanııa quny shamamen 847 mıllıon dollardy qurady. 120 mln dollar qarjy ósimniń kelesi kezeńin jedeldetý maqsatyna jumsalmaq.
«Toptyń IPO-ǵa qatysý úshin berilgen ótinimder sany qazaqstandyq ınvestorlar, bólshek jáne ınstıtýsıonaldyq, sondaı-aq halyqaralyq ınvestorlar qaýymdastyǵynyń qoldaýynyń arqasynda usynystan asyp tústi. Usynystyń 58 paıyzy jergilikti naryqta, 42 paıyzy halyqaralyq naryqta ornalastyrylǵan. Otandyq naryqtaǵy jalpy suranys 483 mln dollardan asty. Jeke ınvestorlar jalpy somasy 216 mln dollarǵa 60 myńǵa jýyq ótinim berip, suranystyń shamamen 53 paıyzy qanaǵattandyryldy», delingen habarlamada.
Jergilikti ınstıtýsıonaldyq ınvestorlar (BJZQ-ny qosa alǵanda) jalpy suranystyń shamamen 38 paıyzyn qamtamasyz etken. Al halyqaralyq ınvestorlarǵa jalpy suranystyń 25 paıyzy tıesili. 1 jahandyq depozıtarlyq qolhattyń baǵasy – 9,5 dollardy, al 1 jaı aksııa úshin 1 073,83 teńgeni qurady.
«Samuryq-Qazyna» AQ basqarma tóraǵasy Nurlan Jaqypovtyń aıtýynsha, jergilikti jáne halyqaralyq ınstıtýsıonaldyq ınvestorlar, sondaı-aq bólshek ınvestorlar tarapynan úlken suranys týyndady. Bul áýe kompanııasynyń jáne jalpy Qazaqstan ekonomıkasynyń joǵary ınvestısııalyq tartymdylyǵyn, sondaı-aq «Air Astana» damý áleýetine jergilikti jáne halyqaralyq naryqtardyń senimin bildiredi deıdi.
Buǵan deıin Eýropalyq qaıta qurý jáne damý banki «Air Astana» aksııasynyń 5 paıyzyn satyp alyp, aksıoner atanǵan edi. Olar IPO sheńberinde qazaqstandyq áýe tasymaldaýshysynyń baǵaly qaǵazdaryna 41,99 mln dollar ınvestısııa quıǵan.
IPO qorytyndysy boıynsha, áýe kompanııasyndaǵy «Samuryq-Qazynanyń» úlesi 51-den 41 paıyzǵa, al BAE Systems PLC-tiń úlesi 49-dan 15,3 paıyzǵa tómendegen.
Qarjy sarapshysy Andreı Chebotarevtiń aıtýynsha, «Air Astana» KASE bırjasynda 49,2 mlrd teńge tartqan.
«Olardyń kem degende jartysy zeınetaqy qarajaty ekeni belgili boldy. Al endi sıfrlarǵa mán berip kóreıik. «Air Astana» eki birdeı qazaqstandyq bırjadan 215 mln dollar tarta aldy, onyń 108,9 mln dollaryn (jańaǵy aıtqan 49,2 mlrd teńgemiz) KASE-den tartty, sonyń ishinde 55,4 mln dollary – zeınetaqy qarajaty. AIX bırjasy arqyly jaı aksııalar men GDR esebinen 106,1 mln dollar tapty. KASE-ge qaraǵanda AIX bırjasynda jeke ınvestorlar men memlekettik emes ınstıtýsıonaldyq oıynshylardyń naqty suranysynyń joǵary bolǵany tańǵaldyrady. Al Qazaqstannyń eski bırjasyndaǵy negizgi kólemniń basym bóligi BJZQ esebinen qalyptasty. Al BJZQ-ny KASE-niń 46,9 paıyzyn ıelenetin Ulttyq bank basqarady», dep derek keltiredi sarapshy.
