Áıeldi ajal aýzynan aman alyp qalǵan adam – Mońǵolııaǵa eńbek sińirgen dáriger, Memlekettik Uly qural depýtaty hám Qorshaǵan orta, azyq-túlik jáne aýyl sharýashylyǵy jónindegi turaqty komıtet tóraǵasy Beısen Bulanuly eken.
Osy qazaq qaıratkerimen ushaqta saparlas bolǵan taǵy bir áriptesi, ıaǵnı Memlekettik Uly qural depýtaty B.Mónhbaıasgalan «www.newsroom.mn» portalynyń áleýmettik jelidegi paraqshasynda jarııalaǵan jazbasynda: «О́tken senbi kúni Ystanbul qalasynan ushyp shyǵyp, Ulan-batyrǵa bettep kele jatqan «Turkish Airlines» áýe laıneriniń ishinde tótenshe oqıǵa oryn aldy. Áýe kemesi Tájikstan aspanynda qalqyp kele jatqan-tyn. Jolaýshylar beıǵam. Báz biri uıqyda. Kenet ekıpaj komandıri, jolaýshylardyń biriniń densaýlyǵy kúrt tómendegenin, esi kiresili-shyǵasyly kúıge túskenin, ushaq ishinde dáriger bolsa kómekke kelýin ótinip, túrik jáne aǵylshyn tilinde jarııa túsirdi. Sol sátte áriptesim Beısen dereý atyp turyp, iske kiristi. Bul azamat ekıpaj múshelerimen tap-taza túrik tilinde sóılesip, ushaqty Dýshanbege qondyrýdyń qajeti joq ekenin, buıyrsa aýrýdy ajal qushtyrmaımyn dep nyq senimmen aıtty jáne ony ajal aýzynan alyp qaldy» dep jazypty.
Joǵarydaǵy jańalyqty estigennen keıin keshe tańmen talasa Beısen Bulanulyna habarlastyq:
– Úkimet jumysymen bir top Uly qural depýtattary Ońtústik Afrıkaǵa baryp, qaıtarda Ystanbul arqyly ushyp kele jatyr edik, – deıdi dáriger baýyrymyz. – Ushaq komandıri bort ishinde jolaýshy esinen tanyp qaldy, degen soń jetip bardym. Meniń uzaq jylǵy dárigerlik tájirıbem, ózimmen birge medısınalyq qural-jabdyq, dári-dármek ala júretin edim. Baryp, ólshep kórsem áıeldiń qan qysymy 220-ǵa (joǵarǵy shek) jetipti. Júrek soǵysy mınýtyna 6-7 ret úzilip soǵyp tur. Bet-álpeti kógerip ketken. Qysqasy, jaǵdaıy kúrdeli. Dereý ottegimen qanymdap, qasymda alyp júrgen qysym túsiretin, júrek soǵysyn retteıtin dárini berip, qosymsha dárigerlik sharalar jasadym. Ushaq ushýyn jalǵastyra berdi. Eki saǵat degende naýqas esin jıyp, Ulan-batyr áýejaıyna aman-esen tabany tıdi...
Qysqasy, 40 jyldyq tájirıbesi bar dáriger osylaı ushaq ishinde aýyrǵan adamdy ajaldan arashalap qaldy.
