Túrkistan oblysy ótken jylǵy saıası dodada elimizdegi eń kóp saılaýshy tirkelgen óńir retinde atalǵan bolatyn. Iаǵnı byltyr saılaýshylardyń tizimine 1 mıllıon 168 myńnan asa adam engizilgen-di. Byltyr naýryzda ótken Parlament Májilisi men barlyq deńgeıdegi máslıhattar saılaýy naýqanynda «Amanat» partııasy oblys boıynsha saılaýshylardyń 56,9 paıyz daýys jınady. О́ńir boıynsha barlyq deńgeıdegi máslıhat depýtattarynyń mandat sany 338 bolsa, sonyń 269 mandatyn, ıaǵnı oblystyq, aýdandyq, qalalyq máslıhat depýtattarynyń 80,2 paıyzyn atalǵan partııanyń ókilderi ıelendi. Sondyqtan bolar óńirde bul saıası uıym belsendi. Depýtattyq korpýs ókilderiniń jumys tıimdiligi partııa qabyldaǵan saılaýaldy baǵdarlamany iske asyrý nátıjelerimen jáne saılaýshylar bildirgen ótinishterdiń oryndalýymen baǵalanatyny málim. Bul oraıda Túrkistan oblystyq máslıhatyndaǵy «Amanat» partııasy fraksııasynyń jetekshisi Altynsary Úmbetálıev búginge deıin saılaýshylardan kelip túsken 1 748 ótinishtiń 97 paıyzy oń sheshimin tapqanyn aıtady. «Memleket basshysy Qasym-Jomart Toqaev partııa popýlızmge salynyp, oryndalmaıtyn ýáde bermegeni jón ekenin aıtqan bolatyn. Sondaı-aq Prezıdent Joldaýynda «Halyqqa kópirme sóz, bos ýáde emes, kózben kórip, qolmen ustaýǵa bolatyn oń ózgerister kerek» ekenin aıtty. Bizdiń maqsatymyz da naqty da nátıjeli isti kórsetý. Saılaýaldy baǵdarlamany iske asyrý jónindegi jol kartamyzda oblys kóleminde aldaǵy besjyldyq merzimde atqarylýǵa tıis jumystar túgel qamtyldy. Halyqtyń suranysyn zerdelep, olardy jergilikti atqarýshy bıliktiń baǵdarlamalyq josparlarymen úılestire otyryp, máni men mazmunyna, mindeti men mejesine saı toptastyryp keshendi josparyn túzdik. Partııa fılıaly qabyldaǵan Jol kartasy oblys úshin mańyzdy 4 negizgi baǵytty qamtıdy. Besjyldyq kezeńde 136 ındıkator boıynsha 542 is-sharany atqarý josparlanǵan. О́tken jyldyń qorytyndysymen 119 ataýly is-shara tarmaqtarynyń 108-i tolyqtaı júzege asyp, jospardy iske asyrýdaǵy oryndaýshylyq tártiptiń deńgeıi 90,7 paıyzǵa jetti. Jol kartanyń oryndalýyn naqtyly sandarmen sóıletetin bolsaq, josparda qamtylǵan mindetter aıasynda óńirimizde 57 kásiporyn iske qosyldy. Onyń ishinde ınnovasııalyq jobalar retinde keramzıtti kirpish óndirý, alıýmınıı profılder shyǵarý isi jolǵa qoıyldy. Ekonomıkasy aýyl sharýashylyǵyna beıimdelgen oblysymyzda jańadan 9 taýarly-sút fermasy, 9 mal bordaqylaý alańy, 6 jylyjaı kesheni jáne 6 balyq ósirý fermasy iske qosyldy. Ashylǵan jumys oryndarynyń sany myń birlikke artty. Jalpy kólemi 853,3 myń sharshy metr bolatyn turǵyn úı, 5 150 oqýshyǵa arnalǵan 20 mektep, Túrkistan qalasyndaǵy «Muz saraıy» kesheni, Maqtaaral, Báıdibek aýdandarynda sport keshenderi salyndy. О́ńirdiń týrıstik tartymdylyǵyn keńeıtýde 2 zamanaýı qonaqúı kesheni, 2 emdeý-saýyqtyrý ortalyǵy iske qosyldy. Partııa uıytqy bolǵan «Týǵan jer» arnaıy jobasy boıynsha mesenattardyń esebinen 127 qoǵamdyq mańyzǵa ıe nysan salynyp, tehnıkalyq jańartýdy qajet etetin 86 nysan jóndeýden ótti», deıdi Altynsary Úmbetálıev.
Sondaı-aq partııanyń saılaýaldy baǵdarlamasyn júzege asyrý sheńberinde oblysta 326,1 myń shaqyrym avtomobıl joldary jóndelip, 44 eldi meken gazben, 20 eldi meken aýyzsýmen qamtylǵan. Otyrar aýdanynda qýaty 50 MVt kún elektr stansasy iske qosyldy. Kentaý qalasynda 55 kópqabatty turǵyn úı modernızasııadan ótti. Oblys boıynsha 85 mekteptiń qazandyqtary qatty otynnan gazǵa aýystyrylǵan. Azamattardyń qaýipsizdigin qamtýda Keles, Sozaq, Saýran, Ordabasy, Saryaǵash, Túlkibas aýdandary men Arys qalasynda 8 órt sóndirý beketi salyndy. О́ńirde byltyr qurylǵan 133,6 myńǵa jýyq jańa oryndarynyń 93,4 myńnan astamy – turaqty jumys. Fraksııa jetekshisiniń aıtýynsha, «Jer amanaty» jobasy boıynsha oblysta 2022 jyly 1 mln-nan astam gektar jaıylym ortaq ıgilikke, byltyr 335 myń gektar jaıylym memleket menshigine qaıtarylǵan. Al «Aýyl amanaty» jobasy aıasynda byltyr memleketten bólingen maqsatty 19,7 mlrd teńgege 3 256 joba qarjylandyryldy. Jobaǵa qatysqan 16 aýdan, qaladaǵy 64 aýyldyq okrýgte jylyjaı keshenderi boı kóterdi, tehnıkalar parki jańartyldy, et-sút qoryn qalyptastyrý sharýashylyqtary quryldy. Aýyl turǵyndarynyń tabysyn arttyrýda egin, mal sharýashylyqtary qarjylandyryldy. Qus jáne balyq ósirý isi jolǵa qoıylǵan. О́ndiristik kooperatıvterdiń qural-jabdyqtaryn jańartý bastamasy qolǵa alynyp, aýyldyq jerde kásipkerlikti damytýǵa negiz qalandy. «Qaryzsyz qoǵam» jobasy aıasynda aýyl-aımaqtarda 12 650 adamdy oqytý kýrstaryna qamtý josparlansa, naqty 14 600 adam qarjylyq saýattylyq boıynsha oqytylyp, jyldyq jospar artyǵymen oryndalǵan. Sondaı-aq saıası uıymnyń belsendiligimen óńirde «Ardagerlerdi ardaqtaıyq», «Kedergisiz keleshek», «Baqytty otbasy», «Ulttyq mura» jobalary júzege asyrylyp keledi.
– Partııa aıqyndaǵan eń negizgi basymdyqtyń biri – turǵyndarmen nátıjeli keri baılanys arnasyn túzý. Byltyr partııa fılıaldarynyń qoǵamdyq qabyldaý bólmelerine 13 287 aryz-shaǵym kelip tústi. Azamattar suranystarynyń 63,2 paıyzy oń sheshimin tapsa, 35,2 paıyzyna zań aıasyndaǵy keńester berildi. Al 219 ótinishtiń qaralý merzimderi naqty belgilenip, oryndalýy baqylaýǵa alynǵan. Oblystaǵy partııalyq alańdarda 3 myńnan asa qabyldaý júrgizilip, olarǵa 10 myńnan asa adam júgindi. Sonymen qatar, shalǵaı eldi meken turǵyndarynyń suranystaryn tyńdaýda 216 mobıldi kóshpeli qoǵamdyq qabyldaý ótip, 1 084 azamattyń aryz-talaptary tyńdaldy. Olardyń teń jartysy sheshimin tapsa, qalǵandaryna zań aıasynda keńester berildi. «Quqyqtyq kómek» jobasy boıynsha aıyna eki márte quqyq qorǵaý organdary ókilderiniń, zańgerlerdiń, advokattardyń, sot oryndaýshylarynyń qatysýymen ashyq esik kúnderin ótkizý, jeke qoǵamdyq qabyldaýlar uıymdastyrý jumystary atqaryldy. Osy formattaǵy 470 qabyldaý júrgizilip, 1 080 azamattyń máseleleri qaraldy. Aryzdardyń 65 paıyzy oń sheshimin tapsa, 35 paıyz kásibı quqyqtyq keńester berildi. «Halyqqa kómek» jobasy sheńberinde 443 qabyldaý ótkizilip, 1300 azamattyń jeke máseleleri qarastyryldy. Kelýshilerdiń 64 paıyzynyń máseleleri oń sheshimin tapty. Partııalyq fılıal janyndaǵy qoǵamdyq keńesterdiń 132 otyrysy ótkizilip, 210 másele qaraldy. Qaralǵan taqyryptar aıasynda memlekettik organdarǵa 432 usynym joldanyp, olardyń oryndalýy partııa nazarynda boldy. Jol kartasyna engen nysandardyń qurylys alańdarynda 50 partııalyq baqylaý beketi qoıylyp, anyqtalǵan 21 kemshilik partııanyń yqpal etýimen túzetildi, – deıdi Túrkistan oblystyq máslıhatyndaǵy «Amanat» partııasy fraksııasynyń jetekshisi Altynsary Úmbetálıev.
Qoǵamǵa meılinshe ashyq bolyp, saılaýshylarmen baılanysty nyǵaıtý maqsatynda oblystyq partııa fılıaly janynan brıfıng alańy ashylǵan. Bekitilgen kestede máslıhat depýtattarynyń jáne aýdan, qalalardyń máslıhat tóraǵalarynyń qatysýymen 49 brıfıng ótip, partııa aıqyndaǵan basymdyqtardyń júzege asyrylý barysy tarazylanǵan. Sondaı-aq fraksııa jetekshisiniń aıtýynsha, «Jastar rýhy» jastar qanaty birqatar mańyzdy jumys atqardy. Stýdenttik jataqhanalardyń ahýalyna monıtorıng júrgizilgen.
Túrkistan oblysy
