Foto: gov.kz
«Elge jetkizilgen shetel azamaty 2020 jyldyń shildesi men tamyzy aralyǵynda transulttyq uıymdasqan top quramynda Qazaqstannan 24 keliden astam altyndy kontrabandalyq jolmen áketýge qatysqan. Nátıjesinde memleketke 633 mıllıon teńgeden astam shyǵyn keltirilgen. Qylmys jasaǵannan keıin qatysýshylar tergeýden jasyrynyp, halyqaralyq izdeýge jarııalanǵan. 2023 jyldyń shildesinde kúdikti Ázerbaıjan aýmaǵynda ustaldy. Qazirgi ýaqytta ol Astana qalasynyń ýaqytsha ustaý ızolıatoryna qamaldy. Atalǵan qylmysty jasaǵany úshin múlkin tárkilep, 8 jyldan 12 jylǵa deıingi merzimge bas bostandyǵynan aıyrý jazasy qarastyrylady», dep jazylǵan aqparatta.
Eske salaıyq, 2022 jyly Astana qalasynyń soty atalǵan transulttyq uıymdasqan toptyń qyzmetine qatysy bar 14 adamǵa túrli jaza kesip, sottalýshylardan memleket paıdasyna 5 mıllıard teńgege jýyq aqsha óndirip alǵan edi.
