Tumaýdyń taraýy oblys aımaqtarynda birdeı emes, eń kóp taraǵan jeri – Petropavl qalasy. Munda barlyq tirkelgen naýqastyń 55 paıyzy shoǵyrlanǵan. Bul – 11 300 adam osy kúni tumaýratyp júr degen sóz. Olardyń taratýymen ınfeksııa kóbeıe túsetini de sózsiz. Al qalanyń irgesindegi Qyzyljar aýdanynda tumaýratqandardyń sany – 1 400-deı.
«Jaman indetten keıin kóptegen adam tumaýdy elemeıtin bolyp barady. Mundaı jaıbasarlyqqa jol berýge bolmaıdy. Juqpaly aýrýlardyń maýsymdyq kóbeıýine sáıkes Memlekettik bas sanıtarlyq dáriger 2024 jyldyń 8 aqpanynda «Aýalyq-tamshylyq jolmen beriletin ınfeksııalyq juqpaly aýrýlardyń aldyn alý sharalaryn kúsheıtý týraly» qaýly qabyldady. Onda medısınalyq mekemelerde barlyq personal men pasıent maska taǵyp júrýge mindetti ekeni aıtylǵan. Sondaı-aq olarda antıseptıkterdiń bolýy da mindetteldi. Al halyq kóp jınalatyn áýejaı, temirjol men avtovokzaldarda, bazarlar men saýda-saýyq ortalyqtarynda, dúkenderde, teatrlar men kınoteatrlarda jáne qoǵamdyq kólikterde maska taǵyp júrý usynylǵan. Aýrýǵa ushyraǵan adamdar úıinen shyqpaýy kerek. Dárigerdi úıge shaqyrǵan jón. Aýyryp qalǵan balalardy mektep pen balabaqshaǵa jibermeý kerek», dedi Á.Jumataev.
Naýqastardyń kóbirek tirkelýi qańtar aıynyń ortasynan bastalyp, aldymen 44 adam H3N2 tumaýymen tirkelgen. Sonyń 36 paıyzy – 14 jasqa deıingi balalar. Al ótken jyldyń sáıkes merziminde dál osyndaı naýqastyń 18 ǵana tirkelgen edi.
Á.Jumataev oblystaǵy qyzylsha dertiniń ahýaly týraly da aıtyp berdi. Byltyr bul kezde mundaı dertke shaldyqqandar múlde tirkelmegen bolsa, búgingi tańda 155 naýqas tirkelipti. Bul derttiń de eń kóbi, ıaǵnı 71 paıyzy Petropavlda tirkelgen. Petropavldan keıin Aqqaıyń, Esil aýdandarynan qyzylsha kóp shyǵyp otyr.
Naýqastardyń 52%-y – 14 jasqa deıingi balalar. Qalǵany – ártúrli jastaǵylardyń úlesinde. Sonyń ishinde 40 pen 49 jas aralyǵyndaǵy 13 adam qyzylshamen naýqastanǵan.
Aýrýdy taratatyn negizgi 14 oshaq anyqtalyp otyr. Onyń ishinde M.Qozybaev atyndaǵy Soltústik Qazaqstan ýnıversıteti, J.Qızatov atyndaǵy joǵarǵy aýylsharýashylyǵy kolledji, birneshe mektep bar. Aýrýdyń aldyn alý sharasy retinde vaksınalaý tanylǵan. Búgingi tańda 19 688 adam vaksına alǵan.
Soltústik Qazaqstan oblysy
