Foto: gov.kz
Spektakldiń ár qoıylymy anshlagpen ótip, qazirgi ýaqytqa deıin 68 myńǵa jýyq kórermen tamashalady. Qoıylym Aqtaý, Atyraý, Oral, Taldyqorǵan, Almaty, Taraz, Shymkent, Túrkistan qalalary teatrlarynda kórsetilse, bıyl da ártisterdiń basqa óńirlerdegi gastroldik sapary josparlanyp otyr.
Mýzykalyq dramanyń avtory - Qazaqstannyń eńbek eri, Memlekettik syılyqtyń ıegeri, jazýshy, dramatýrg Dýlat Isabekov, qoıýshy rejısseri jáne sahnalyq nusqasyn jasaǵan - Qazaqstannyń eńbek sińirgen qaıratkeri Ashat Maemırov.
«Gaýhartas» mýzykalyq dramasy «UMAI-2023» ulttyq júldesiniń «Teatr óneri» nomınasııasy boıynsha «Úzdik spektakl» atandy.
Sondaı-aq atalǵan mýzykalyq dramada Saltanattyń rólin somdaǵany úshin teatr aktrısasy Inabat Rızabekova respýblıkalyq «Synshylar júldesi - 2023» marapattaý keshinde «Jyl aktrısasy-2023» nomınasııasyna ıe boldy. «Gaýhartas» mýzykalyq dramasyndaǵy halyqtyń «Qudasha» áni men bıi sanaýly saǵatta áleýmettik jelilerde mıllıonnan asa qaralym jınap, jastar arasynda trendke aınaldy. Tipti, Qytaı elindegi jastardyń beınejazbasy da keńinen tarady.
