Q.Sátbaev atyndaǵy Qazaq ulttyq zertteý ýnıversıtetiniń zertteýshileri múmkindigi shekteýli jandarǵa dári-dármekti jyldam jetkizý úshin geksakopter jasap shyǵardy. Az qabatty úıler men alys aýyldarǵa dári-dármek jetkizýge arnalǵan ushqyshsyz ushatyn apparat atalǵan ýnıversıtettiń «Elektrotehnıka, telkommýnıkasııalar jáne ǵaryshtyq tehnologııalar» kafedrasynda qurastyryldy.
Joba jetekshisi, atalǵan joǵary oqý ornynyń qaýymdasqan professory Abdýmejıt Daraevtyń aıtýynsha, magıstranttar men stýdentter toby qajet jaǵdaıda dárigerlerdiń jyldam kómek kórsetýine septesetin, qolaısyz aýa raıynda da jol talǵamaı, jedel medısınalyq kómek kórsete alatyn qurylǵy jasaýdy ózderine maqsat etip qoıǵan.
– Biz shalǵaı, qatynaýǵa qıyn soǵatyn jerlerge dári-dármekti jetkizetin ushqyshsyz ushý apparattaryn jasaýǵa qajetti grant utyp aldyq. Osy jobany iske asyrýǵa ýnıversıtetimizde oqıtyn bakalavrıattar men magıstranttar atsalysyp jatyr. Bul ǵylymı jumyspen jarty jyldaı jumys istep kelemiz. Qazirgi ýaqytta ushaqsyz ushý apparaty qoldanysqa daıyn dese bolady. Qurylǵyny ýnıversıtet aýmaǵynda synaqtan ótkizip te úlgerdik. Nátıjesinde, eki patent aldyq. Endi bir aıdan soń túrli alańdarda synap kórmekpiz. Bizdiń bilimimiz elimizdiń damýyna jarasa deımiz. Sondyqtan aldaǵy ýaqytta apparatty kúndelikti ómirde qoldanýǵa engizýge eńbektenip jatyrmyz, – deıdi ǵylymı joba jetekshisi A.Daraev.
Al joba zertteýshileriniń sózine qaraǵanda, qurylǵyny dári-dármek tasýǵa qoldaný jetkizý ýaqytyn qysqartady, bul óz kezeginde el azamattarynyń yńǵaıly ómir súrýine, sol arqyly ómir sapasyn jaqsartýǵa járdemdesedi. Álemde mundaı apparattardy muqtaj jandarǵa medısınalyq kómek kórsetýde keńinen qoldanady. Dári-dármekti jetkizý úshin ushqyshsyz ushý apparattaryn paıdalaný jetkizý ýaqytyn qysqartyp qana qoımaı, qosymsha jetkizýshi adamnyń qyzmetine jáne kólikke shyǵyn shyǵarmaýǵa múmkindik beredi. Ushqyshsyz ushý apparattarynyń manevrlik jáne dál ushý qabileti óte joǵary, sondyqtan mundaı qurylǵylar dári-dármekti eń qıyn jerlerge de jetkize alady. Tek dári-dármek jetkizý qaýipsizdigin qamtamasyz etý úshin qurylǵynyń júk kótergish qabileti de shekteýli bolatynyn esten shyǵarmaǵan abzal.
