Dúnıejúziniń 50 elinen 300 jobanyń ishinde atalǵan jobany Birikken Ulttar uıymynyń damý baǵdarlamasy, Public Digital jáne AWS ınstıtýty erekshe atap ótip, ony basqa memleketterge paıdalanýǵa usyndy. Bul elimiz úshin úlken jetistik qana emes, ol álemdik ınnovasııaǵa qosqan úlesimizdi kórsetti. The Future of Government Awards sıfrlyq sheshimder men tehnologııalar arqyly adamdardyń ómirin ózgertetin praktıkterdi, toptardy jáne kóshbasshylardy aıryqsha ataıdy. Atalǵan júlde bar ıdeıany qaıta paıdalaný men beıimdeýdiń mańyzyn kórsetip, bastapqy ashyq kodty sheshimdi jańa tásildermen sátti paıdalanǵan uıymǵa beriledi. Ásirese munda basqalardan úırenip, bastapqy ashyq kodty sheshimder tájirıbesine súıenetin Úkimettiń kóshbasshylyǵyna basa nazar aýdaryldy.
Aıta keteıik, «Smart Data Ukimet» – 87 derek bazasy biriktirilgen memlekettik derekter qory. Onda vedomstvoaralyq saraptamany óte jyldam qurýǵa múmkindik beretin derekpen jumys isteıtin kóptegen qural bar. Atalǵan qor úlken derek boıynsha sheshim qabyldaýdyń tehnologııalyq negizin jasady.
Sondaı-aq jaqynda «Otbasynyń sıfrlyq kartasy» jobasy Dýbaıda ótken dúnıejúzilik úkimettik sammıttiń álemdik arenasynda 1 300 ótinimniń ishinen «Inklıýzıvti sıfrlyq transformasııa» sanatynda laıyqty dep tanyldy. Bul marapat memlekettik qyzmetterdiń sapasyn jaqsartý men otbasylardyń ál-aýqatyn qamtamasyz etýge arnalǵan ınnovasııalyq tásildiń mańyzyn aıshyqtady.
Otbasynyń sıfrlyq kartasy – 40-tan astam memlekettik derekqordan azamattar týraly aqparatty eskeretin biregeı skorıngtik model. Joba 100-den astam krıterııge súıene otyryp, otbasylardyń ál-aýqatynyń sanatyn anyqtap, muqtaj adamdarǵa kómek kórsetýge múmkindik beredi. Mereıli marapat Eńbek jáne áleýmettik qorǵaý mınıstrliginiń elimizdegi Birikken Ulttar Uıymynyń damý baǵdarlamasymen birlesip atqarǵan jumysynyń tabysty nátıjesi dep aıtamyz.
BAÁ qurǵan GovTech Prize bastamasy memlekettik saladaǵy ınnovasııalyq sheshimderdi taný men yntalandyrýda mańyzdy ról atqarady. Bul tájirıbe almasýǵa jáne álemdegi memlekettik organdar arasynda ozyq dúnıeni taratýǵa yqpal etip qana qoımaı, halyqtyń ómir súrý sapasyn jaqsartady.
