Bıylǵy 1 aqpandaǵy derekke súıensek, Memlekettik áleýmettik saqtandyrý qorynan (MÁSQ) jumysynan aıyrylýyna baılanysty áleýmettik tólem alýshylardyń sany 79,1 myń adamǵa jetti. Bul rette bıyl 25 myń adamǵa atalǵan tólem alǵash ret taǵaıyndaldy. Tólemderdiń jalpy somasy 5,7 mlrd teńgeni qurady.
Qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline jáne keıingi 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady. Tólem joǵalǵan kiristiń 45%-yna deıingi mólsherde MÁSQ qarajaty esebinen beriledi. Tólem taǵaıyndaý úshin jumystan bosatylǵan jumyskerge eGov.kz portalynda ótinimdi jiberý qajet. Olarǵa bir kún ishinde turǵylyqty jerindegi mansap ortalyǵy bos jumys oryndaryn usynady. Eger jumys tabylmasa, úsh jumys kúni ishinde qashyqtan jumyssyz mártebesi beriledi. Bul qyzmetti onlaın rejiminde Elektrondyq eńbek bırjasy (enbek.kz) arqyly da alýǵa bolady.
MÁSQ qarajaty esebinen jumysynan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady jáne bul jumyssyz adamdy jumys izdegen kezeńde qoldaýǵa arnalǵan.
Memleket basshysynyń 2022 jyldyń 1 qyrkúıegindegi Joldaýynda aıtylǵan tapsyrmasyn iske asyrý maqsatynda byltyrdan bastap joǵalǵan tabysty almastyrý koeffısıenti 40%-dan 45%-ǵa deıin ulǵaıtyldy. Bul rette tólem taǵaıyndaýdyń aǵymdaǵy tártibi saqtaldy jáne jumysynan aıyrylǵan jáne jumyssyz mártebesin alǵan áleýmettik saqtandyrý júıesine qatysýshylarǵa ǵana qoldanylady.
Budan buryn habarlanǵandaı, Eńbek jáne halyqty áleýmettik qorǵaý mınıstrligi Elektrondyq eńbek bırjasy arqyly halyqty jumyspen qamtý ortalyqtarynyń qashyqtan qyzmet kórsetý fýnksıonalyn iske qosty. Bul jumyssyzdardy tirkeý jáne azamattardyń jumyspen qamtýdy qoldaý boıynsha memlekettik qyzmetterdi, onyń ishinde jumysynan aıyrylý boıynsha áleýmettik tólemderdi alý rásimderin jeńildetýge múmkindik berdi. Endi barlyǵyn tek ınternet, kompıýter jáne elektrondyq sıfrlyq qoltańba arqyly ǵana jasaýǵa bolady.
