Nátıjeli sapar

Búginde Qazaqstan men Qytaı arasyndaǵy dostyq, tatýlyq jáne uzaqmerzimdi strategııalyq áriptestik qarym-qatynas belsendi damyp keledi. Prezıdent Qasym-Jomart Toqaev QHR-ǵa resmı sapary aıasynda Sı Szınpın­men kezdesip, 2022 jyly eki elge ortaq mádenı ortalyq­tar qurý týraly kelisimge qol jetkizdi. Elder arasyn­daǵy mádenı dıalogti damytýdaǵy bul mańyzdy qadam máde­nıet pen óner salasyndaǵy yn­ty­maqtastyqty nyǵaıtatyny anyq.

«Qytaı men Qazaqstan – uzaq ýaqyttan beri strategııalyq odaqtas, sondaı-aq barlyq sala boıynsha tyǵyz qarym-qatynas ornatqan seriktes. Búgingi kezdesý eki el arasyndaǵy tatýlyq­ty odan ári nyǵaıtýǵa jáne ózara tıimdi yntymaqtastyqty damytýǵa berik negiz boldy. Biz óz tarapymyzdan ortalyqtyń ashylýyna qatysty barlyq máseleni jedel sheshýde barynsha qoldaý kórsetemiz», dedi Sýn Elı.

Sapar barysynda Qytaı­daǵy Qazaqstan orta­lyǵy­nyń mazmundyq tujy­rymdamasy ázirlenip, ǵımarat tańdaý­ǵa qatysty uıymdastyrýshy­lyq máseleler men quqyq­tyq aspektiler pysyqtal­dy. Sondaı-aq mınıstr­ler mádenıet salasyndaǵy keli­simderge qol qoıý arqyly birlesken jumysty kúsheıtýdi kózdeıdi. Eki vedomstvonyń odan ári baılanysyn arttyrý úshin teatr jáne konsert­tik ujymdar arasyndaǵy gastrolder, kórmeler men klassıkalyq ádebıet týyndylaryn ózara aýdarý, basyp shyǵarý jáne taǵy basqa jobalar qarastyrylǵan.

A.Balaeva Qazaqstan úshin Qytaıdan muraǵat materıal­dary men mádenı murany qaıtarýdyń mańyzyna toq­taldy. Oǵan qosa sırk óneri men horeografııa salasyndaǵy stýdentter men oqytýshylarǵa arnalǵan QHR mamandary­nyń sheberlik synyptaryn ót­kizý, kınematografııa boıynsha granttar bólý, mýzeı isi salasynda tájirıbe almasý jáne tarıhı-mádenı murany saqtaý, restavrasııalaý ózekti ekenin atap ótti.

Jumys sapary barysynda mınıstr QHR radıo jáne teledıdar isteri jónin­degi Mem­lekettik basqarma basshysy Sao Shýmınmen de júzdesti. 

«Qazaqstan-Qytaı serik­tes­­tigi barlyq salada jaq­sy qarqynmen damyp kele­di. Eki eldiń telearnalary birqatar birlesken jobany júzege asyrdy. Biz jańa formatta kontent jasaý arqyly mıkroserıaldar men elder týraly beınerolıkter túsirip, olar­dy teledıdarǵa taratý baǵy­tyndaǵy jumysty kúsheıtýdi usynamyz», dedi Sao Shýmın.

Otyrysta Aıda Balaeva QHR telearnalarynda kór­kem, derekti, anımasııalyq fılmderdiń rotasııalanýy­na qoldaý surady. Sony­men qatar birlesken serıal, Qazaqstannyń kórikti jerleri men mádenı nysandary týraly rolıkter túsirýde kómektesýge ázir ekenin aıtty. Izinshe mınıstr habar taratý aýqymy boıynsha álem­degi eń iri BAQ-ta kórsetiletin Qytaıdyń televızııalyq shoý­laryna otandyq mádenıet ókilderiniń qatysýyna erekshe qyzyǵýshylyq tanytatynyn qulaǵdar etti.

Al A.Balaevanyń QHR «Global China Media Corpo­ration» iri medıa korpora­sııa­synyń bas dırektory Shen Haısıýnmen kezdesýinde qytaılyq tarap eki eldiń má­denı murasy men mádenı qun­dylyqtaryn nasıhattaýǵa baǵyt­talǵan derekti fılm­der shyǵarý týraly kelisim jasaý­dy usyndy. QHR Ult­tar isteri jónindegi Memleket­tik ko­mıtet tóraǵasy Pan Iýemen júzdesýde mınıstr Qazaq­­stan tarıhynda alǵash ret qurylǵan kópultty «Bir­lik» án-bı ansambliniń Beı­jińge gastroldik saparyn uıymdastyrýdy qozǵady.

Mádenıet jáne aqparat mınıstriniń Beıjińge ju­mys saparynda Qytaı Úlken teatrynyń dırektory Van Nınmen kezdesip, taraptar eki eldiń teatr ónerin damytý máselelerin talqylady. Qazaq­standyq delegasııa «Úlken qyzyl arman» qoıylymyn tama­shalap, bıik estetıkalyq deńgeıde qoıylǵan bı dramasy­nan erekshe áser aldy. Aıta keteıik, Naýryz meıramy qar­sańynda Qytaı radıostansalarynda qazaq kúıleri beriledi.