Sýretterdi túsirgen Erlan OMAR
Áýelgi quttyqtaý sóz Premer-mınıstrdiń orynbasary – mádenıet jáne aqparat mınıstri Aıda Balaevadan jetti.
«Sherhan Murtazanyń kisilik kelbeti men qarymdy qalamgerligi árbir ultjandy azamatqa úlgi bolýǵa tıis. Keleli keńes abyroıly ótip, ulttyq baspasóz kúni qutty bolsyn», degen ráýishtegi habarlamany atalǵan mınıstrliktiń qujattama jáne kitap isi komıtetiniń tóraǵasy Rýstam Álı oqyp berdi.
Sherhan Murtazanyń «Egemen Qazaqstan» gazetin basqarǵan kezeńi – basylymnyń altyn dáýiri sanalady. Kelesi sóz kezegi sol jyldary Sheraǵanyń «shekpeninde» tálim alǵan, búginde aǵa býyn jýrnalısterdiń ókili, memleket jáne qoǵam qaıratkeri Saýytbek Abdrahmanovqa berildi. Ol bas redaktordyń qaıtpas qaısarlyǵyna toqtaldy. Jas jýrnalısterge jiger berip, eshteńeden taısalmaıtyn minez tárbıelegen sheberligin sóz etti.
Ras, Sherhantaný búgin keshendi, kóp salaly ǵylymǵa aınaldy. Onyń kórkem shyǵarmalary qaıta basylyp jatyr, pesalary sahnadan túsken joq, pýblısıstıkasy bir tóbe, joǵary oqý oryndarynda qalamgerdiń atynda aýdıtorııa bar. Alaıda onyń redaktor retindegi sheberligi áli de tolyq ashylmaǵan aral. Saýytbek Abdrahmanov Sherhan Murtazanyń osy qyryna ǵylymı zertteý qajet ekenin basa aıtty. Onyń sózin aǵa jýrnalıst Erkin Qydyr da qýattady.
El gazetiniń ardager tilshisi Janat Elshibek sol kezdegi «Sosıalıstik Qazaqstan» gazetiniń tabaldyryǵyn attaǵan jastyq shaǵyn eske aldy. Bas redaktor Sherhan Murtazanyń ujymynda istegenine óte baqytty ekenin jetkizdi.
«Ol tártiptiń adamy edi. О́te jaspyn ǵoı. Redaksııanyń ishki talabyn bilmesem kerek, erkin kıinip keldim. Sol kezde Sherhan Murtaza munymdy qatty synǵa aldy. Árdaıym galstýkpen júrýimdi talap qyldy. Aǵa sóziniń qýaty – sol, áli kúnge deıin gazet tabaldyryǵyn galstýksyz attamaımyn», dedi aqsaqal jýrnalıst.
«Sherhan aǵa – shyn mánindegi reformator edi. Taǵaıyndalǵanyna bir aı bolmastan, gazetke ózgeristerdi batyl engizdi. Sonyń biri – aı attary. Ol kezde olardyń bári orys tilinde jazylatyn. Sherhan Murtaza kelisimen biz «jeltoqsan», «aqpan», «naýryz» dep jaza bastadyq. Bizge arqa tirep birneshe gazet aı attaryn qazaqshalady. Artynsha «Sosıalıstik Qazaqstan» ataýyn «Egemendi Qazaqstan» dep bir-aq aýystyrdy. Bul – úlken erlik.
Aǵamyzdyń qatqyl minezinen, týrashyldyǵynan yqqan birshama zamandastarym «Sheraǵanyń azýynda shaınalyp ketpeı qalaı aman júrsiń?» deıtin. Biraq redaktorymyz syrtqa solaı kóringenimen, júregi sondaı jyly, jumsaq-tuǵyn», dedi Janat Elshibek.
«Egemen Qazaqstan» gazetiniń bas redaktorynyń orynbasary Talǵat Batyrhan Sherhan Murtazanyń reformatorlyq qabiletin asa joǵary baǵalap:
«Gazet shyǵaratyn redaktorlar bolady, gazetti jasaıtyn adamdar bolady. Sheraǵam gazetti jasaǵan jan edi», dep tebirendi T. Batyrhan.
Balbal tastan baspasózge deıin: Álem nege gazet oqı bastady?
Jıyn sońynda Ulttyq arhıvtiń dırektory Saǵıla Nurlanova qatysýshylardyń barlyǵyna alǵys aıtyp, Sherhan murasynyń arhıvke tolyq ótkenin, birqatar qoljazbanyń sıfrlanǵanyn jáne eń bastysy óte qaýipsiz jerde saqtalyp turǵanyn jetkizdi.
Aıta keteıik, qujattar áýeli destelenip, zerthananyń aýa temperatýrasyna úıretiledi. Artynsha azot toltyrylǵan arnaýly vakýýmde saqtalady. Onyń ishinde qaǵaz betindegi kózge kórinbeıtin zııankester óledi. Odan alyp shyǵyp arnaýly mamandar qujatty qalypqa keltirýmen aınalysady. Bir paraqty óńdeýge bir kún ketedi. Osylaısha, «syrqattanyp» kelgen qoljazbalardy «emdep» shyǵady. Tup-týra adam emi sııaqty. Sherhan Murtazanyń «Egemen Qazaqstan» gazetinen kelip túsken qaǵazdar sany 6 myń danany qurady. Mamandar árqaısyn óńdep, túgeldeı sıfrlandyrdy.
