Onkologter, neırohırýrgter men kardıohırýrgter, endokrınolog, allergologter men genetıkter jáne basqa da baǵyttaǵy 30-ǵa jýyq dáriger eki kún boıy qaraǵandylyq naýqastarǵa medısınalyq kómek kórsetedi.
Yntymaqtastyq kelisimniń maqsaty – aımaǵymyzdaǵy medısınalyq qyzmet sapasyn jaqsartyp, aq jeleńdi jandardyń kásibı biliktiligin kóterý. О́ńir basshysy Ermaǵanbet Bólekpaev bul memorandýmnyń óńir úshin mańyzdy ekenin atap ótti.
– Prezıdent Is Basqarmasynyń Medısınalyq ortalyǵy – densaýlyq saqtaý salasyndaǵy kóshbasshy qurylymnyń biri. Biz dárigerlerimizdiń kásibıligin birlesip arttyramyz. Jemisti yntymaqtastyqqa jáne alǵa qoıylǵan maqsattar men mindetterge qol jetkizýge úmittenemiz, – dedi oblys ákimi.
Atalǵan ortalyq basshysy Alekseı Soı Astanaǵa Qaraǵandydan kelgen, Qaraǵandy medısına ýnıversıtetinde bilim alǵan mamandardyń kóptigin aıtady.
– Aldaǵy ýaqytta birlesip Jol kartasyn ázirleý mindeti tur. Biz medısına qyzmetkerlerin zamanaýı oqytý, menedjment standarttaryn engizý, sondaı-aq praktıkalyq densaýlyq saqtaý, alǵashqy medısınalyq-sanıtarlyq kómek máselelerin birge pysyqtaımyz. Pasıentterdiń medısınalyq kómekti basqa jerge barmaı, oblystyń ózinde emdelýin qamtamasyz etý – negizgi mindetimiz. Bul úshin aımaqta bar jaǵdaı jasalǵan, zamanaýı jabdyqtar ornatylǵan. Ákimdik densaýlyq saqtaýdy jańǵyrtý jumysymen júıeli túrde aınalysyp keledi. Dárigerlerdiń kásibıligi de – joǵary. Tek buryn jasalmaǵan belgili bir baǵyttar boıynsha oqytý, úıretý kerek. Qaraǵandylyq mamandar tez ıgerip ketedi dep oılaımyn. Eń bastysy – mamandar arasynda tyǵyz deńgeıde baılanys ornatý. Jaǵdaıy aýyr naýqastardy bizge jiberýge bolady. Bizdiń medısınalyq ortalyq MÁMS júıesi arqyly tegin kómek kórsetedi. Degenmen naýqastyń óz óńirinde emdelýine, bul úshin jergilikti jerde barlyq jaǵdaıdy jasaýǵa basymdyq beriledi, – deıdi A.Soı.
Medısınalyq ortalyq mamandarynyń Qaraǵandyǵa keletini eki-úsh apta buryn habarlanǵan.
– Ortalyq mamandaryna jaǵdaıy aýyr naýqastar týraly derekter aldyn ala usynyldy. Soǵan sáıkes tıisti baǵyttaǵy mamandar keldi. Aldaǵy bir-eki kún mamandar úshin de, naýqastar úshin de nátıjeli bolady dep oılaımyn, – deıdi oblystyq densaýlyq saqtaý basqarmasynyń basshysy Bıbigúl Tólegenova.
Memorandýmǵa qol qoıǵannan soń elordalyq qonaqtar professor H.Maqajanov atyndaǵy kópbeıindi aýrýhanaǵa baryp, bólimshelerdi aralap, klınıka jumysymen tanysyp shyqty.
Qaraǵandy oblysy
