Atynda turǵandaı, «Birlik» álem halyqtarynyń mádenıetin nasıhattaıdy. Ár halyqtyń áni men bıin aspaptyq súıemeldeýmen oryndaıtyn halyqaralyq ujymnyń quramyna elimizde turatyn etnos ókilderiniń arasynan úzdik 20 bıshi men mýzykant iriktelip alynǵan. Ujymnyń erekshe ári eksklıýzıvti bı kompozısııalaryn qoıýǵa Reseı, Tatarstan, О́zbekstannan shaqyrylǵan kórnekti shetel mamandary jáne Qazaqstannyń eńbek sińirgen qaıratkerleri atsalysypty. Alǵys aıtý kúnine oraılastyrylǵan búgingi konsertke qyzý daıyndyqty keshe qoıýshy rejısser Saıan Myrza, horeograftar Anel Marabaeva, Aıda Bekıshova, baletmeıster Janataı Qojabekov júrgizip jatyr.
«Birlik» ansambliniń ereksheligi bizdiń elde turatyn etnos ókilderiniń ártisterinen jasaqtalyp otyr. «Otanymyzdaǵy ár halyqtyń óneri men mádenıetin, folkloryn, tipti umytýǵa aınalyp bara jatqan qundylyqtaryn kórsetýdi kózdedik. Olardyń árqaısysynyń áni men bıinen bólek aspaptary – óz aldyna bir tóbe. Sonymen qatar elimizdegi etnostardan quralǵan ansambl arqyly rýhanı tutastyqty áıgilegimiz keledi. Ansamblde ánshiler, bıshiler, ártúrli aspapta oryndaýshylar óner kórsetedi. О́nerpazdardy biz nebári bir jarym aıdyń ishinde iriktep aldyq», deıdi konserttiń qoıýshy rejısseri Saıan Myrza.
Horeograf, Mádenıet qaıratkeri Aıda Bekıshevanyń aıtýynsha, ansamblde qazaq qyzdarymen qatar ózge ult ókilderi de barshylyq. «Atap aıtqanda, orys, káris, ózbek, taǵy basqa etnos ókilderi bar. Bulardyń bári astanalyq emes, basqa da aımaqtardan irikteldi. Máselen, orystyń qyzy ózbek bıin, ýkraın qyzy káris bıin, tatar, orys qyzy qazaqtyń bıin bılegenin tamashalaı alasyzdar. Tek qana bı emes, ártúrli janr qamtyldy. Án, mýzyka, hor, etnostardyń ulttyq aspaptary. Buıyrsa, barlyǵyn on bes nómirge syıdyrýdy josparlap otyrmyz. Shama kelgenshe qysqa-nusqa qoıýǵa tyrystyq. Bir buryshtan bıshiler shyqsa, bir shetten baraban, ekinshi jaqtan arfa, ana jerde «Astana sazy» oınap turady degendeı. Mysaly, tatar bıiniń daıyndyǵyn Qazannan kelgen Tatarstannyń eńbek sińirgen ártisteri uıymdastyryp ketti. О́zbekterdiń bıin Ferǵanadan kelip qoıdy. Cheshen-ıngýshtardyń ónerin kiriktirýge Almatydan ózderiniń mádenı birlestiginen «Bahor» bıin bıleýshi ujym atsalysýda. Jalpy aıtqanda, munda biz ortaq Otandaǵy baýyrlastyqty negiz etemiz», deıdi ol.
Qaı halyqtyń bolsyn tóltýma sıpaty ulttyq án-kúıi men bıinen kórinetini belgili. Al sonyń bárin bir arnaǵa biriktirip, halyqqa usynýda shyǵarmashylyq ujymnyń eńbegi orasan ekeni aıtpasa da túsinikti.
«Buryn Qazaqstan Assambleıasy kúninde ónerpazdardy búkil aımaqtan jınap áýrege túsetin edik. Ol aıtarlyqtaı qıyndyq týdyratyn. Endi sonyń bári osy «Birlik» ansambliniń quramynan tabylady. Jáne barlyǵyn joǵary deńgeıde uıymdastyrýǵa tyrystyq. Bolashaqta bul ujym keńeıtilip, kórkeıe túsedi degen oıdamyz. Elimizde túrikter, belorýstar, moldovandar, ýkraındar da bar emes pe? Kelesi daıyndyqtarǵa olar da shyǵady. Bolashaqta Astanada ǵana qalyp qoımaı, Qazaqstannyń basqa da qalalaryn aralaýymyz múmkin», deıdi baletmeıster-horeograf Janataı Qojabekov.
«Birlik» ansambliniń quramynda óner kórsetetin jas bıshi Aleksandrına Homıskaıa koreı halqynyń bıin bıleıtinin aıtady.
«Bıdi álem halyqtary bıiniń solısi Anel Marabaeva qoıdy. Kezinde osy bıdi ózi bılegen eken. Endigi kezek maǵan kelgen sııaqty. Men úshin bul – úlken mártebe. Oryndaıtynym fılosofııalyq nómir dese bolady. Erjúrek qyzdyń jandúnıesiniń tereńdigin bı arqyly kórsete alýym kerek. Árıne, úlken jaýapkershilikti talap etetin bı. Jalpy, konsert kórermenniń kóńilinen shyǵady degen oıdamyn», dedi bıshi.
