Mádenıet jáne týrızm basqarmasynyń basshysy men aýdan, qala ákimderine osyndaı tapsyrmalar bergen oblys ákimi Darhan Satybaldy talanttardy izdeý, konkýrs uıymdastyrý, ótkiziletin mádenı is-sharalar respýblıkalyq, halyqaralyq deńgeıde bolýy qajettigin atap ótti. О́kinishke qaraı, Túrkistan oblysynyń 600-den astam eldi mekeninde mádenıet úıi joq. Ásirese shalǵaı aýyldardaǵy mádenıet úıleri men klýbtardyń jaı-kúıi, tehnıkalyq bazasy syn kótermeıdi. Olardyń basym kópshiligi 90-shy jyldary jekeshelenip ketken. Vıse-premerdiń atyna depýtattyq saýal joldaǵan senatorlar keltirgen málimetterge júginsek, elimizde qazir jumys istep turǵan 2035 Mádenıet úıiniń 770-i jáne 2006 aýyl klýbynyń 608-i kúrdeli jóndeýdi qajet etedi. Keıbiri tozyǵy jetse, endi biri apattyq jaǵdaıda tur. Elimizdegi 3 891 kitaphananyń 79%-y aýyldyq jerlerde, alaıda olardyń 60%-dan astamy eskirgen. Osy oraıda Túrkistan oblysynda byltyr «Aýyl el – besigi» baǵdarlamasy aıasynda 13 Mádenıet úıi kitaphanasymen birge paıdalanýǵa berilgenin aıta ketelik.
Al jýyrda ashylǵan Shardara aýdanyna qarasty Jaýshyqum aýyldyq okrýgindegi mádenıet úıiniń jobalyq-smetalyq quny – 443263 myń teńge. «Aýyl – el besigi» memlekettik baǵdarlamasy aıasynda salynǵan jańa ǵımarat ulttyq qor esebinen qarjylandyrylǵan. Mádenıet úıinde bı, dombyra, sýret úıirmesi jumys isteıdi. Onda arnaıy mamandar qyzmet etpek. Mádenıet jáne týrızm basqarmasynyń basshysy Ázimhan Qoılybaevtyń aıtýynsha, óńirde kreatıvti ındýstrııa aımaǵyn qurý jumystary qolǵa alynǵan. Damytý tujyrymdamasy ázirlenip, negizgi baǵyttary aıqyndalǵan.
О́ńirde 691 mádenıet jáne óner mekemesi halyqqa qyzmet kórsetip keledi. Bıyl mádenıet salasyn damytýdyń negizgi alty baǵyty boıynsha josparlar daıyndalǵan. Túrkistan qalasynyń monýmentti óner týyndylarynyń ornatylýy týraly tujyrymdama daıyndaldy. Keıingi 3 jylda ornatylǵan monýmentti óner týyndylaryna monıtorıng jumystary júrgizilip, 17 zańsyz ornatylǵan monýment zańdastyrylǵan. IýNESKO-nyń halyqaralyq tizimine engizý maqsatynda júrgizilgen «Arpaózen» tarıhı-mádenı keshenine arheologııalyq zertteý jumystary nátıjesinde 5000-nan astam petroglıf syry ashylyp, usynys joldanady. Qazirgi tańda petroglıfterdiń esep kartochkalary, ǵylymı saraptamalary daıyndalyp, jańadan tarıhı-mádenı mura nysandary anyqtaldy.
Bıyl atalǵan petroglıfterge zertteý jumystarynyń ekinshi kezeńi júzege asyrylmaq. Oblystaǵy aldyn ala esepke alý tiziminde turǵan jergilikti 100 tarıhı-mádenı mura obektilerine ǵylymı saraptama júrgiziledi.
Sondaı-aq bıyl memlekettik shyǵarmashylyq tapsyrys aıasynda ónim berýshi úıirmeler arasynda tuńǵysh ret oblystyq óner baıqaýy uıymdastyrylady. «TURKIsTANYM» jobasy aıasynda óńirdegi kıeli oryndar men Túrkistan qalasyndaǵy erekshe oryndar týraly tanymdyq rolıkter túsirilip, áleýmettik jeliler arqyly nasıhattalyp jatyr. Aýyldarda otandyq kınolardy nasıhattaýda turaqty túrde kınokórsetilimder uıymdastyrylǵan. Sondaı-aq kitap oqıtyn oqyrmandar sanyn arttyrý, halyq mádenıetin kóterý maqsatynda birqatar aýqymdy jobalar qolǵa alyndy. Tuńǵysh ret respýblıkalyq deńgeıde jańa termeler baıqaýyn uıymdastyrý josparlanyp otyr. Sonymen qatar respýblıkalyq deńgeıde atap ótiletin tulǵalardyń mereıtoılaryn atqarý baǵytyndaǵy is-sharalardyń jospary ázirlenip jatyr. Álemge belgili kórkemóner ujymdary men oryndaýshylardyń, teatrlardyń gastrolderin, sondaı-aq iri shetel mýzeıleriniń kórmelerin uıymdastyrý kózdelgen. Oblystyq «Baltańdaı», respýblıkalyq «Túrkistan daýsy» dástúrli formatta, al halyqaralyq «Voice of Turan» baıqaýy bıyl erekshe formatta ótkiziletin bolady.
Túrkistan oblysy
