Saltanatty is-sharaǵa oblystyq mádenıet basqarmasynyń basshysy Quralbek Atamuratov, mádenıet salasynyń qyzmetkerleri, óńirge belgili sýretshiler men óner synshylary, stýdentter men oqýshylar qatysty.
«Ábilhan Qasteev – artyna túrli janrdaǵy kóptegen kartınalardy mura etip qaldyrǵan birtýar daryn ıesi. Bul kartınalardyń birazy Qostanaı oblystyq tarıhı-ólketaný murajaıynyń altyn qorynda saqtaýly tur. Sýretshiniń shyǵarmashylyq qorynda portret janry mańyzdy oryn alady. Ábilhan Qasteev 1944 jyly halyq qaharmany Amangeldi Imanovtyń portretin salǵan. Derekterde qylqalam sheberiniń halyq batyrynyń portretin salýǵa uzaq daıyndalǵany aıtylady. Amangeldi beınesin barynsha dál uqsatý maqsatynda sýretshi Torǵaı óńirine arnaıy kelip, batyrdyń týystarymen, kózin kórgen qarııalarmen áńgimelesip, kópshiliktiń sýretteýi boıynsha batyr portretiniń birneshe nobaıyn jasap shyǵarady. Biraq aldaryńyzda turǵan kólemdi portretti tek 1944 jyly salǵan. Keıin Amangeldiniń kózin kórgender daıyn portrettegi Amangeldi beınesin kórip, «qalaı dál aınytpaı salǵan» dep qatty tańǵalǵan desedi. Atalǵan týyndysy úshin Ábilhan Qasteevke Halyq sýretshisi ataǵy berildi», deıdi mýzeı basshysy Gúljan Meńdikenova.
Mýzeı qyzmetkerleriniń aıtýynsha, Á.Qasteev 1916 jylǵy Torǵaı kóterilisi taqyrybyna 20 jyldaı ýaqytyn sarp etken. Kórmeden qylqalam sheberiniń álemge áıgili týyndylarymen qatar, «Amangeldi Imanovtyń otrıady joryqta» atty kólemdi keskindemesi men Amangeldi sarbadarynyń portretterin de kórýge bolady.
Qostanaı oblysy
