Osyndaı jaýapty qyzmette júrgen krımınalısterdiń biri, biregeıi - О́skemen qalasy polısııa basqarmasynyń jedel krımınalıstıkalyq bóliminiń krımınalıst mamany, polısııa kapıtany Aınur Ahmetova.
«Mindetim, qylmyskerdiń qaldyrǵan izderin, zattaı dáleldemelerin taýyp, qylmys jasady degen kúdikti adamdy tabý», deıdi Aınur Oralbekqyzy.
Quqyq qorǵaý salasynda azdy-kópti qyzmet etken kapıtan A.Ahmetovanyń qyraǵylyǵy men tájirıbesiniń arqasynda az qylmys ashylǵan joq. Urlyqty da, tonaýdy da, qandy qol qylmyskerlerdi de áshkereledi.
Krımınalıst arýdyń aıtýynsha, qylmysker kóbinese esikten nemese terezeden kiredi. Ondaı jaǵdaıda untaq arqyly qoly tıdi-aý degen zattardan saýsaq izin alady. Eger qolǵappen kirse, odorologııalyq saraptama jasap, ıisin salystyrady. Budan basqa da saraptama jumystarynyń túrleri kóp sekildi.
«Jumystyń eń aýyry – kisi ólimine barý. Bul jerde de kúdiktini jedel tabýdy maqsat etemiz. Sonymen qatar, qandaı jaǵdaıda, neden ólgenin anyqtaý. Máselen, pyshaq jatýy múmkin, ony zertteımiz. Qanyna deıin alyp, bıologııalyq saraptama júrgizemiz», deıdi Aınur Ahmetova.
Jer betine adam jaratylǵaly qylmystyń qatar kele jatqanyn joqqa shyǵara almaspyz. Bylaıǵy jurtqa qala ishi typ-tynysh bolyp kóringenimen, quqyq qorǵaý salasynyń qyzmetkerleri oqys oqıǵa ortasynda júredi. Jýyqta dámhanalardyń birinde qala turǵynynyń qalta telefony joǵalyp, oqıǵa ornyna jetken polıseıler adamdardyń bárin tysqa shyǵarǵan. Ǵımarat ishinde tekserý júrgizilip jatqan sátte Aınur Ahmetova ádettegideı jan-jaǵyn fotoǵa túsiredi. Túsire júrip, ájethanaǵa kiredi. Kirse, qalta telefonyn urlaǵan kúdikti qarsy aldynda turǵan eken. Iá, keıde qylmys sol sátte-aq ashylyp jatsa, endi birde jyldar boıy dáleldiń ushyn tabý qıynǵa soǵyp jatady. Qandaı qıyndyq bolsa da qyzmetine adal Aınurdaı arýlar kóp bolsyn deımiz.
