Tarıhı-ólketaný murajaıy Abaı oblysyndaǵy Besqaraǵaı aýdanynyń Nurlybek Baımuratov atyndaǵy orta mektebinde ashylǵan. Tarıhtan berer taǵylymy mol murajaıǵa aýdannyń ár jyldardaǵy ótkeninen maǵlumat beretin aıǵaqtar jınaqtalǵan. Qazir kóne zattar toptamasy arqyly biregeı murajaı bolyp otyr.
Murajaı oqýshylarǵa, qyzmetkerlerge rýhanı azyq alatyn jaıly ortaǵa aınalǵan. Atalǵan murajaı da aqyn Nurlybek Baımuratovtyń atymen atalady. Murajaıdyń negizin mekteptiń burynǵy dırektory Toqtaǵan Kákenov pen qazaq tili men ádebıeti páni muǵalimi Ýálıhan Týkýsov 1991 jyly 20 qyrkúıekte qalaǵan. Mekteptiń qazirgi dırektory Meıramǵalı Keńesbekulynyń aıtýynsha, murajaıǵa kóptegen kórnekti adamnyń tabany tıgen. Qytaı, Anglııa, Reseıden kelgen týrıster mazmuny baı murajaıdy tamashalaǵan.
Murajaıda eksponattar, turmystyq zattar (patıfon, syrmaq, qabyrǵa saǵat, er-toqym, qamshy, shapan jáne mýzykalyq aspaptar (dombyra, balalaıka, mandolına) qoıylǵan. Sondaı-aq murajaı ótken men búginniń sabaqtastyǵyn saqtaǵan oryn sekildi, óıtkeni onda elektrtehnıkalyq úıirme oqýshylarynyń ártúrli tehnıka maketteri qoıylǵan. Atap aıtqanda, radıobaılanys arqyly basqarylatyn K-700 traktorynyń modeli, shóp shabatyn shapqysh jáne janar-jaǵarmaı quıatyn tirkelmeli arba bar.
Bolashaqta murajaı jádigerlerin jańǵyrtyp, qoryn toltyrý jáne aqynnyń týǵanyna 140 jyl tolýyna oraı oblystyq konferensııa ótkizý josparlanyp otyr.
