Qasym-Jomart Toqaev pen Ilham Álıev BAQ ókilderi úshin brıfıng ótkizdi

Prezıdent Ázerbaıjandy Qazaqstannyń strategııalyq seriktesi retinde atap ótip, baýyrlas memleketke jasaǵan saparynyń mán-mańyzyna toqtaldy.

«Bul memlekettik sapar elderimiz arasyndaǵy yntymaqtastyqty odan ári damytý turǵysynan óte mańyzdy. Menimen birge úlken delegasııa keldi. Bul baýyrlas Ázerbaıjan eline josparlanǵan osy memlekettik saparǵa meılinshe tyńǵylyqty daıyndalǵanymyzdy bildiredi. Búgin biz tıisti qujattar men kelisimderge qol qoıý rásimine qatystyq. Eń bastysy, aradaǵy kelisimge sáıkes, eki el úkimetteri men basqa da salalyq vedomstvolar joǵary deńgeıdegi kezdesýler barysynda qol jetkizilgen ýaǵdalastyqtardy tolyqqandy júzege asyrýǵa bar kúsh-jigerin jumsaıdy», dedi Qazaqstan Prezıdenti.

Memleket basshysy Qazaqstan men Ázerbaıjannyń yqpaldastyǵy dostyqqa, senimge, bir-biriniń múddesin qurmetteýge jáne eskerýge negizdelgen memleketaralyq qatynastyń ozyq úlgisi sanalatynyn aıtty. Qasym-Jomart Toqaevtyń pikirinshe, joǵary deńgeıdegi baılanystardyń bári eki el arasyndaǵy strategııalyq seriktestik pen odaqtastyq qatynastardy nyǵaıtý úshin óte paıdaly. Prezıdent Joǵary memleketaralyq keńestiń alǵashqy otyrysynda talqylanǵan máselelerdiń mańyzdylyǵyna nazar aýdardy.

«Biz búgin búkil álemde resýrstardan bólek, kólik-logıstıka salasyndaǵy múmkindikterge qol jetkizý úshin básekelestik kúsheıip kele jatqany týraly aıttyq. Bul – strategııalyq sala. Qazaqstan da, Ázerbaıjan da senimdi seriktestikter retinde bul baǵytta tyǵyz qarym-qatynas jasap jatqany qýantady. Sıan portynan Qazaqstan aýmaǵy arqyly Ázirbaıjanǵa deıingi temirjol baǵdaryn ashýdyń ózi kóp nárseni ańǵartady. Bul, shyn máninde, óte mańyzdy shara. Biz sıfrlandyrý, jasandy ıntellekt júıesin qurý, Kaspıı teńiziniń tabany arqyly optıkalyq-talshyqty baılanys jelisin tartý baǵyttarynda kúsh-jiger biriktirý týraly pikirlestik.  Munyń bári – biregeı jobalar», dedi Prezıdent.

Qasym-Jomart Toqaev mádenı-gýmanıtarlyq yntymaqtastyq máselelerine arnaıy toqtaldy. Sondaı-aq Qazaqstannyń mádenıet kúnderin joǵary deńgeıde ótkizgeni úshin Ázerbaıjan tarapyna rızashylyǵyn bildirdi. 

«Biz óz elimizde Ázerbaıjan mádenıetiniń maıtalmandaryn asyǵa kútemiz. Bul is-sharanyń tabysty ótetinine eshqandaı kúmán joq. О́ıtkeni Ázerbaıjan mádenıetine degen qyzyǵýshylyq qashanda joǵary. Týrasyn aıtqanda, Sizdiń eldiń mádenıetine Qazaqstan halqynyń yqylasy erekshe. Biz ázerbaıjan óner qaıratkerlerin qushaq jaıa qarsy alamyz», dedi Memleket basshysy.

Qazaqstan Prezıdenti kópjaqty qurylymdar aıasyndaǵy yntymaqtastyqty nyǵaıtý mańyzdy ekenin aıtty.

«BUU, TMU, EQYU, AО́SShK, SPEKA jáne TMD sııaqty asa mańyzdy halyqaralyq uıymdar aıasyndaǵy yqpaldastyǵymyzdy aıryqsha atap ótkim keledi. Menińshe, bul qarym-qatynastyń aýqymy keń jáne halyqaralyq deńgeıdegi yntymaqtastyǵymyz odan ári jalǵasa beredi.  Strategııalyq seriktestik turǵysynan kelgende, munyń da máni zor», dedi Qasym-Jomart Toqaev.

О́z kezeginde Ázerbaıjan Prezıdenti Ilham Álıev memlekettik saparmen kelgeni úshin Qasym-Jomart Toqaevqa alǵys aıtyp, kelissózderdiń nátıjesine kóńili tolatynyn jetkizdi.

«Transkaspıı kólik dálizi – aımaqtyq yntymaqtastyq deńgeıin anyqtaıtyn naqty baǵyt. О́ıtkeni kórshi eldermen jaqsy qarym-qatynas ornatpaı, tranzıttik elge aınalý múmkin emes. Bul rette Qazaqstan da, Ázerbaıjan da óńirlik yntymaqtastyqqa, kórshilermen qarym-qatynasyn nyǵaıtýǵa beıildi ekenin tanytyp otyr. Bizdiń aramyzdy tek Kaspıı teńizi ǵana bólip jatyr. Alaıda búginde onyń ózi  kedergi emes. Kerisinshe, Kaspıı tek elderimizdi ǵana emes, kóptegen memleketterdiń arasyn jalǵaıtyn kópir sanalady. Sebebi Transkaspıı kólik baǵyty óziniń áleýetin tolyq ashýǵa kiristi. Búgin Úkimet músheleri kóptegen másele boıynsha egjeı-tegjeıli baıandama jasady. О́zara yqpaldastyq pen birlesken is-áreketterdiń nátıjeleri, eń bastysy, bolashaq josparlarymyz, shyn máninde, óte aýqymdy», dedi Ilham Álıev.

Qazaqstan men Ázerbaıjan prezıdentteriniń kelissózi nátıjesinde mynadaı qujattarǵa qol qoıyldy:

1. Qazaqstan Respýblıkasy men Ázerbaıjan Respýblıkasy Joǵary memleketaralyq kenesiniń birinshi otyrysynyń sheshimi;
2. Qazaqstan Respýblıkasynyń Kólik mınıstrligi men Ázerbaıjan Respýblıkasynyń Sıfrlyq damý jáne kólik mınıstrligi arasyndaǵy teńiz kemeleri ekıpaj músheleriniń kásibı dıplomdaryn ózara taný týraly kelisim;
3. 2017 jylǵy 3 sáýirdegi Qazaqstan Respýblıkasynyń Bilim jáne ǵylym mınıstrligi men Ázerbaıjan Respýblıkasynyń Bilim mınıstrligi arasyndaǵy bilim berý salasyndaǵy yntymaqtastyq, onyń ishinde doktorantýraǵa oryn bólý týraly kelisimge ózgerister engizý týraly hattama;
4. Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi men Ázerbaıjan Respýblıkasynyń Sıfrlyq damý jáne kólik mınıstrligi arasyndaǵy ǵarysh keńistigin beıbit maqsattarda zertteý jáne paıdalaný salasyndaǵy ózara túsinistik týraly memorandým;
5. Qazaqstan Respýblıkasynyń Mádenıet jáne aqparat mınıstrligi men Ázerbaıjan Respýblıkasynyń Mádenıet mınıstrligi, Ázerbaıjan Respýblıkasynyń Jastar jáne sport mınıstrligi arasyndaǵy 2024-2025 jyldarǵa arnalǵan is-sharalar jospary;
6. «Samuryq-Qazyna» AQ men Ázerbaıjan ınvestısııalyq holdıngi (AIH) arasyndaǵy strategııalyq seriktestik týraly kelisim;
7. «QazMunaıGaz» ulttyq kompanııasy» AQ men Ázerbaıjan Respýblıkasynyń memlekettik munaı kompanııasy arasyndaǵy Ázerbaıjan Respýblıkasynyń aýmaǵy arqyly qazaqstandyq munaı tranzıtiniń kólemin kezeń-kezeńimen ulǵaıtý týraly kelisim;
8. «QazMunaıGaz» ulttyq kompanııasy» AQ men Ázerbaıjan Respýblıkasynyń memlekettik munaı kompanııasy arasyndaǵy qazaqstandyq munaıdy satyp alý-satý salasyndaǵy strategııalyq yntymaqtastyq týraly memorandým;
9. Qazaqstan Respýblıkasy Prezıdentiniń janyndaǵy «Ortalyq kommýnıkasııalar qyzmeti» respýblıkalyq memlekettik mekemesi men Ázerbaıjan Respýblıkasynyń medıany damytý agenttigi arasyndaǵy yntymaqtastyq týraly memorandým;
10. Qazaqstan Respýblıkasynyń  «Damý» kásipkerlikti damytý qory» AQ men Ázerbaıjan Respýblıkasynyń «Shaǵyn jáne orta bıznesti damytý agenttigi» jarııa quqyq zańdy tulǵasy arasyndaǵy yntymaqtastyq týraly memorandým;
11. Atyraý qalasynyń ákimdigi (Qazaqstan Respýblıkasy) men Shırvan qalasynyń atqarýshy bıligi (Ázerbaıjan Respýblıkasy) arasyndaǵy yntymaqtastyqty damytýdyń 2024-2026 jyldarǵa arnalǵan is-sharalar jospary;
12. Aqtaý qalasynyń ákimdigi (Qazaqstan Respýblıkasy) men Sýmgaıt qalasynyń atqarýshy bıligi (Ázerbaıjan Respýblıkasy) arasyndaǵy yntymaqtastyqty damytýdyń 2024-2026 jyldarǵa arnalǵan is-sharalar jospary;
13. «Damý» kásipkerlikti damytý qory» AQ men Ázerbaıjan Respýblıkasynyń Shaǵyn jáne orta bıznesti damytý agenttigi (KOBIA) arasyndaǵy yntymaqtastyq týraly memorandým sheńberinde shaǵyn jáne orta bıznesti qoldaý sharalaryn iske asyrý jónindegi jol kartasy;
14. Qazaqstan Respýblıkasynyń «Memlekettik tehnıkalyq qyzmeti» AQ men Ázerbaıjan Respýblıkasynyń Arnaýly baılanys jáne aqparattyq qaýipsizdik qyzmeti arasyndaǵy aqparattyq qaýipsizdik salasyndaǵy ózara túsinistik týraly memorandým.