Jıynda sóz alǵan Ulybrıtanııanyń Qazaqstandaǵy elshisi Ketı Lıch joǵary bilim berýdi ınternasıonaldandyrýdyń mańyzyn atap ótti.
«Júıeniń úsh negizgi ózgerisine nazar aýdarý mańyzdy: retteý, sapa jáne aǵylshyn tilin bilý. Eń aldymen, Qazaqstandaǵy transulttyq bilim berýdi retteýdi halyqaralyq standarttarǵa sáıkes keltirý óte mańyzdy. Bul tirkeýdiń jáne jumys isteýdiń termınologııasy men úderisterin anyqtaýǵa kómektesedi, olardy jergilikti naryqqa kirgisi keletin kez kelgen ýnıversıtet úshin ashyq etedi. Bul máselelermen Ǵylym jáne joǵary bilim mınıstrliginiń janynan Brıtandyq Keńespen, Ulybrıtanııanyń Capany qamtamasyz etý agenttigimen (QAA), Bıznes jáne saýda mınıstrligimen (Department Business and Trade) jáne qoldanystaǵy halyqaralyq seriktestikter men joǵary bilim berý sektorynyń basqa da sarapshylarymen birlesip qurylǵan jumys toby aınalysady», dedi K.Lıch.
Al Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenova Qazaqstan men Ulybrıtanııa arasyndaǵy ózara áriptestikke toqtaldy. Onyń aıtýynsha, búginde Qazaqstan men Ulybrıtanııa ýnıversıtetteri arasynda 59 kelisimshart jasaldy. Ulybrıtanııa ýnıversıtetterimen birlesken ǵylymı jobalardyń jalpy sany 9-dy qurady. Qazaqstan men Ulybrıtanııa arasyndaǵy professorlyq-oqytýshylar quramy men stýdentterdiń akademııalyq almasýy belsendi túrde júzege asyrylyp jatyr.
«Internasıonaldandyrý – qazirgi tańda joǵary bilim berýdiń eń ózekti baǵyty jáne bul tek stýdentterdiń utqyrlyǵymen ǵana shektelmeıdi. Internasıonaldandyrý bilim berý baǵdarlamalaryn ınternasıonaldandyrý, bilim berý standarttaryn ıntegrasııalaý jáne strategııalyq bilim berý seriktestikterin qurý arqyly álemdegi ýnıversıtetterdiń básekege qabilettiligin arttyratyn transulttyq bilim berýdi qamtıdy. Brıtandyq ýnıversıtettermen seriktestik týraly aıtatyn bolsaq, eki el arasynda osy baǵytta ózara qyzyǵýshylyqtyń artyp kele jatqanyn atap ótken jón», dedi G.Kóbenova.
Ǵylym jáne joǵary bilim mınıstrliginiń aqparatyna súıensek, is-shara Ulybrıtanııa men Qazaqstan ýnıversıtetterine transulttyq bilim berý salasynda halyqaralyq áriptestik ornatýda mańyzdy aqparat almasýǵa múmkindik berdi. Qatysýshylar transulttyq bilim berý seriktestiginiń tabystylyǵyn jáne sapaly transulttyq bilim berý seriktestigin qurý jáne qoldaý kezinde qandaı negizgi túıtkilderge tap bolǵanyn anyqtaý boıynsha tájirıbesin bólisti. Jıynda spıkerler halyqaralyq áriptestikti damytý jáne transulttyq bilim berýde sapany qamtamasyz etý tetikterin jetildirý strategııalary týraly baıandady. Brıtandyq Keńestiń creative Spark jáne InterLinks granttyq baǵdarlamalary bes jyl ishinde 1,2 mıllıon fýnt sterlıngten kóp ınvestısııa jasap, Ulybrıtanııa men Qazaqstan arasynda 20-dan asa seriktestik qurylýyn qoldady. Jaqynda júrgizilgen eki baǵdarlamanyń nátıjelerin baǵalaý qorytyndysy qazaqstandyq ýnıversıtetter úshin ǵana emes, Ulybrıtanııa úshin de mańyzdylyǵyn kórsetti. Brıtandyq Keńes sapany qamtamasyz etý agenttigimen (QAA) jáne Ulybrıtanııanyń bıznes jáne saýda mınıstrligimen (DBT) birlesip transulttyq bilim berý jáne sapany qamtamasyz etý boıynsha jumys toby quryldy.
