Dıanany ózge ónerpazdardan oqshaýlap kórsetip turatyn bir ereksheligi – ol sonaý Jitiqara aýdanynda on bir jyl boıy orys mektebinde oqyp, ózge tildi ortada eseıip boıjetti. Birinshi synyptan-aq mektep sahnasynan kórinip, «Jitiqara arýy», «Jitiqara daýsy» sııaqty óner baıqaýlarynyń jeńimpazy atanǵan balaýsa qyz mektepti támamdaǵan soń, tildik qorynyń taıyzdyǵyna qaramastan, táýekelge bel býyp Almatyǵa attanyp, anaý-mynaý emes, T.Júrgenov atyndaǵy qara shańyraqqa kelip qujatyn tapsyrady.
«Alla qoldap, ózim arman etken óner akademııasyna da qabyldandym. Meniń boıyma sahna men til qudiretin qatar sińirgen – osy bilim ordasy. Ár róldi oınaǵan saıyn, týǵan tildiń qadir-qasıetin uǵynyp, tereńine boılaı berdim. Maǵan til úıretken – sahna, teatr desem bolady. Keıin Qostanaı sahnasynda eń alǵash aqyn qyz Zııash Qalaýovanyń rólin oınadym. Sol kezdegi teatrymyzdyń bas rejısseri Ersaıyn Tóleýbaı aǵamyz tájirıbemniń joqtyǵyna qaramastan, osy róldi senip tapsyrdy. Birinshi qoıylym. Súıekti ról. Alǵash júreksingenim de ras. Biraq spektakl aıaqtalǵan soń, zal toly kórermenniń qoshemetin kórip, kóńilim ornyna tústi. Sodan beri kóptegen qoıylymda basty rólderdi oınap kelemin. Kez kelgen ról men úshin jańa álem, jańa ómir. Qaı keıipkerimniń de jan dúnıesin, qýanysh-qaıǵysyn, bolmys-minezin óz júregimmen tereń sezinip almaıynsha, ol róldi oınaı almaımyn», deıdi sahna sheberi.
Dıananyń boıyndaǵy talant qýatyn kópshilik kórermen ǵana emes, kásibı teatr mamandary da joǵary baǵalaıdy. Alla Taǵalanyń ózi tal boıyna óner bitkenniń bárin úıip-tógip bere salǵan sııaqty: án salady, bı bıleıdi. О́zi beınelegen keıipkeriniń jan dúnıesin tereń túsinetin ishki dramatızmi óte myqty. Kez kelgen róldi, meıli komedııa, meıli drama, meıli plastıkalyq, mýzykalyq spektaklder bolsyn, jerine jetkizip oınaıdy.
«Dıana qyzymyz kóptegen úlken rólderde oınady. Mysaly, Shyńǵys Aıtmatovtyń «Ana – Jer-Ana» tragedııasyndaǵy Álımannyń rólin aıtýǵa bolady. Men jumysqa kelgen jyly rejısser Nurlan Ábdiqadyrov osy spektakldi daıyndap, pandemııaǵa baılanysty kórermenge qoıyp úlgermeı ketip qalǵan eken. Men sol spektakldi alatynyn alyp, qosatynyn qosyp, ózimshe qoıdym. Repetısııa barysynda maıdanǵa ketken kúıeýinen qara qaǵaz kelgen Álımannyń ómirden túńilip óz-ózine qol jumsamaq bolyp, oraqty ala salyp, óziniń tamaǵynan oryp jibergisi keletin kórinis bar. Álıman oraq alyp júgirgen kezde áıelder qolynan ustap qalyp jyǵylady. Sodan keıin keletin bir mátin bar: «Apa, meni soǵysqa jiberińizshi! Men fashısterdi óltirip kelemin» deıdi. Osy biraýyz sózdiń ishinen sondaı bir sharasyzdyq, sondaı bir qaısarlyq, áıelge ǵana tán názik álsizdik tárizdi birneshe boıaý qatar shyqty ǵoı. Repetısııada otyryp óz kózimmen kórgen sondaı bir sát búkil jan dúnıemdi jylatyp jibergen edi. Bul jaǵynan kelgende Dıana óte keremet aktrısa. Jalpy, Dıana qalalyq, oblystyq deńgeıdegi mádenı is-sharalarǵa da úlgerip jumys jasaıdy. Úıdegi otaǵasyna, bala-shaǵa, ata-anasyna – bárine úlgerip shapqylap júrip bárin tyndyrady. Dıana teatrǵa berilgen jan. Qandaı qıyn sátter bolsyn, kez kelgen sátte osy Dıanaǵa senim artamyz. Sózińdi jerde qaldyrmaıdy. Mysaly, keshe ǵana bir aktrısamyz Astanadan Qostanaıǵa jete almaı jolda qalyp qalypty. Endi onyń ornyna tez arada daıyndalyp, róldi oınap berý kerek qoı. Sol jaýapkershilikti Dıana óz moınyna aldy. Ol «Syǵan serenadasyndaǵy» Izoldany, «Sholpannyń kúnásindegi» Sholpandy, áıteýir bizdiń teatrymyzdaǵy basty rólderdiń bárin oınap shyqty. Teatr ujymy kóptegen halyqaralyq baıqaýlarǵa jıi shyǵyp turady. Mundaı shyǵarmashylyq saparlarda kórermenniń kózine eń aldymen Dıanamyz iligedi. Sondyqtan Dıana Qostanaı teatrynyń búgingi bet-kelbeti desek te artyq bolmaıdy», deıdi I.Omarov atyndaǵy Qostanaı oblystyq Qazaq drama teatrynyń kórkemdik jetekshisi Batyrbek Shambetov.
Qostanaı oblysy
