Jaz shyǵa Almaty-Ekaterınbýrg tasjolynda tynym joq. Bul kúre joldan tóbesine qaıyq qańtaryp alǵan kólikti kóp kezdestiresiz. Bári Balqashty betke alǵan. Eldiń kóbi taban kúıdiretin qumy men dertke daýa tuzdy sýyn ańsap, aǵylady jan-jaqtan.
Týrızmdi jetildirý úshin ınfraqurylymnyń, onyń ishinde joldyń saırap jatqany asa mańyzdy. Uzaqqa sozylǵan Qaraǵandy – Balqash tasjolynyń qurylysy da bıyl qara kúzge, qarashaǵa deıin aıaqtalady. «Degenmen avtobannyń bir jaq jolaǵy ashylyp, Balqashqa aparatyn jol jaqsardy», deıdi týrısterdiń kóbi.
Joǵaryda atap ótkenimizdeı, bıyl kól jaǵasynda jeti demalys aımaǵy salynady. Mundaǵy oryn 219 týrıske shaqtalmaq.
– Balqash – týrızmniń oshaǵy. О́ńirimizge jan-jaqtan, syrt elden týrıster aǵylady. Qaladaǵy kól jaǵajaıyn kórkeıtý jumystary áli de jalǵasyn taýyp jatyr. Týrıstik múmkinshiligi artyp keledi. Qala ekonomıkasyna byltyr quıylgan ınvestısııany odan arǵy jylmen salystyrsaq, 9,2 mlrd teńgege artyp, 67,5 mlrd teńgege jetken. Boljam boıynsha bıylǵy kórsetkish budan da joǵary bolyp, 69 mlrd teńgege deıin ósedi dep josparlaýdamyz. Byltyr Aqtoǵaı aýdany aýmaǵynyń bir bóligi Balqashqa qosylyp, týrızmdi damytýǵa jańa múmkindik ashyldy. Jańadan salynatyn jeti demalys aımaǵynyń quny 1,450 mlrd teńgeni quraıdy, – deıdi Balqash qalasynyń ákimi Sapar Sataev.
Iá, byltyr Aqtoǵaı aýdanyna qaraǵan Shubartúbek, Torańǵalyq kenti Balqash qalasyna ákimshilik-aýmaqtyq túrde qosylǵan edi. Aýmaǵy – 8 744 ga. Ekeýi de – Balqash kóliniń jaǵalaýynda ornalasqan, tirshiligi qyz-qyz qaınaǵan týrıstik aımaq. Munda 20 qonaqúı men 54 demalys aımaǵy jumys isteıdi. Iаǵnı Torańǵalyqta – 514 nómir, Shubartúbekte 451 nómir bar. Shahar basshysy áli de kól jaǵasynda 120 ga bos jer ýchaskesi bar ekenin aıtady. Bıyl bul ýchaskeler aýksıon arqyly berilmek. Byltyr jaǵajaıdy jańǵyrtý boıynsha jumystar qolǵa alynǵan edi. Qaladaǵy jaǵajaıdy abattandyrý jumystary bıyl aıaqtalmaq. Buǵan qosa Torańǵylyq pen Shubartúbekte sý qubyrlaryn salý boıynsha jobanyń jobalaý-smetalyq qujattamasy ázir. Týrısterdiń qaýipsizdigin de nazardan qalys qaldyryp otyrǵan joq. Osy maqsatta byltyr Shubartúbek kentinde polısııa jáne tótenshe jaǵdaılar qyzmetkerleriniń beketteri qoıyldy. Bıyl dál osyndaı nysandardy Torańǵalyq kenti men «Bertis» shyǵanaǵy aýdanynda ornatýdy josparlap otyr. Jáne beınebaqylaý júıesin kúsheıtpek.
– Memleket basshysynyń tapsyrmasy negizinde Balqash óńiriniń kólik ınfraqurylymyn damytý jumystary bastaldy. 2022 jyly Balqash qalasynyń áýejaıy kommýnaldyq menshikke qabyldandy. Endi ony úsh joba sheńberinde keshendi qaıta qurý josparlanyp otyr. «Ushaq jolaǵyn (RD-2) jáne áýejaı perronyn qaıta jańartý», «Áýejaı ǵımaratyn qaıta qurý», «Arnaıy kólik qyzmeti ǵımaratynyń qurylysy» sekildi jobalar bar. О́tken jyly Aqshaǵyl kentinde (Rembaza) Kókshe teńizdiń jaǵalaýyndaǵy «Balqash Tourfest – 2023» festıvali uıymdastyryldy. Eki kúnge jalǵasqan jaǵajaıdaǵy jaıdarly sátter týrızmniń tynysyn asha túsýge yqpal etedi. Mundaı festıvaldiń alǵash ret ótkenin aıta ketkenimiz jón. Bul – epıdahýaldyq úzilisten keıin týrıstik maýsym ýaqytynda uıymdastyrylǵan tuńǵysh aýqymdy is-shara. Muny dástúrge aınaldyrý arqyly aımaǵymyzdaǵy týrızmdi damytamyz degen senimdemiz, – deıdi qala ákimi.
О́ńirdegi týrızm salasyn osyndaı qadamdar arqyly alǵa jetelep, keler jylǵa deıin týrıster sanyn keminde 4 esege ósirýdi oılastyryp otyr.
Qaraǵandy oblysy
