Kollajdy jasaǵan – Almas MANAP, «EQ»
NJSh-daǵy qarajat turǵyn úı jaǵdaıyn jaqsartýǵa jáne BJZQ-men tıisti kelisimder jasasqan ýákiletti operatorlar arqyly bilim alýǵa aqy tóleýge arnalǵan. NJSh-ǵa aýdarylǵannan keıin qarajat dollarmen saqtalady. 2024 jyly kámelettik jasqa tolǵannan keıin nysanaly jınaqtardy alýshylar ózderiniń nysanaly jınaqtaryn kórsetilgen maqsattarǵa paıdalaný quqyǵyna ıe bolady.
Baǵdarlama iske asyryla bastaǵan alǵashqy aıda – 2024 jylǵy 1 naýryzdaǵy jaǵdaı boıynsha jalpy somasy 42 078,34 dollardy quraıtyn 422 ótinish oryndaldy (BJZQ ýákiletti operatorǵa ótinish berýshilerdiń banktik shottaryna esepteý úshin aýdardy). Onyń ishinde turǵyn úı jaǵdaıyn jaqsartý maqsatynda 16 016,04 dollarǵa 162 ótinish, bilim berý aqysyn tóleý úshin 26 062,30 dollarǵa 260 ótinish oryndaldy.
BJZQ taratqan aqparatqa súıensek, qarajatty turǵyn úı jaǵdaıyn jaqsartý úshin paıdalanýdy tańdaǵandar arasynda eń belsendi bolǵan – Shymkent qalasynyń turǵyndary (2 108,84 dollarǵa 21 ótinish oryndaldy). Ekinshi orynda – Almaty qalasynyń turǵyndary (1 707,28 dollarǵa 17 ótinish oryndaldy). Úshinshi orynda – Abaı oblysynyń turǵyndary (1 406,24 dollarǵa 14 ótinish oryndaldy).
Bul rette odan ári jınaqtaý úshin turǵyn úı qurylysy jınaq salymyndaǵy aqshasyn tolyqtyrý maqsatynda 13 105,12 dollarǵa 133 ótinish oryndalǵan. Azamattyq-quqyqtyq mámileler boıynsha menshikke turǵyn úı satyp alýǵa (túpkilikti esep aıyrysý) – 1 105,20 dollar, úı satyp alý úshin ıpotekalyq turǵyn úı qaryzyn alý boıynsha 602,08 dollar mólsherinde bastapqy jarna engizildi.
Sonymen birge qarajatty bilim berý aqysyn tóleý úshin paıdalaný boıynsha da kósh basyna Shymkent turǵyndary shyqty. Olardyń jalpy 5 422,86 dollar somasyna 54 ótinishi oryndalǵan. Ekinshi orynda – Jetisý oblysynyń turǵyndary (3 111,96 dollarǵa 31 ótinish oryndaldy). Úshinshi orynda – Almaty qalasynyń turǵyndary (2 709,88 dollarǵa 27 ótinish oryndaldy).
«Osy baǵyt boıynsha eń tanymal qosalqy maqsattardyń ishinde Qazaqstan aýmaǵynda ornalasqan bilim berý uıymdarynyń bilim berý qyzmetterin úlestermen (árbir akademııalyq kezeń nemese oqý jyly úshin) nemese búkil oqý merzimi úshin bir mezgilde tolyq kólemde aqy tólemin jasaýdy erekshe atap ótýge bolady. Bul rette 21 240,98 dollarǵa 212 ótinish oryndaldy. Tanymaldyǵy boıynsha ekinshi orynda – bilim berý jınaqtaý salymy týraly shart boıynsha bilim berý jınaqtaý salymyn tolyqtyrý (2 813 dollarǵa 28 ótinish oryndaldy). Úshinshi orynda – sheteldik bilim berý uıymdarynyń bilim berý qyzmetterin úlestermen (árbir akademııalyq kezeń nemese oqý jyly úshin) nemese búkil oqý merzimi úshin bir mezgilde tolyq kólemde aqy tóleý (1 104,68 dollarǵa 11 ótinish oryndaldy)», dep aqparat beredi zeınetaqy qory.
Eske sala keteıik, bul tek alǵashqy eseptelgen qarajat. Jyl saıyn Ulttyq qordyń ósýi jáne ınvestısııalyq tabys alý esebinen onyń mólsheri ulǵaıyp otyrady. Budan bólek, eseptelgen qarajat Ulttyq qor aktıvteriniń quramynda ınvestısııalanýyn jalǵastyrady jáne baǵdarlamaǵa qatysýshy balalarǵa olar 18 jasqa tolǵanǵa deıin qosymsha ınvestısııalyq tabys ákeledi.
2024 jyldyń 1 qańtaryndaǵy jaǵdaı boıynsha, baǵdarlamaǵa qatysýshylardyń jalpy sany – 6 919 131 bala (2006 jyldyń 1 qańtary men 2023 jyldyń 31 jeltoqsany aralyǵynda ómirge kelgen balalar). Onyń ishinde 304 815 qatysýshy 2024 jyly 18 jasqa tolady. Olardyń barlyǵyna 100 dollar 52 sent mólsherinde birdeı maqsatty talaptar somasy eseptelgeni belgili.
Balanyń nysanaly talaptarǵa qatysýshylar tizimine qosylǵany týraly aqparatty ata-analar nemese basqa da zańdy ókilder kids.enpf.kz saıty arqyly balanyń JSN nómiri boıynsha teksere alady. Munda sonymen birge baǵdarlama sharttarymen tanysyp, qajetti nusqaýlyq alyp, qyzyqtyrǵan saýaldarǵa jaýap tabý múmkindigi de bar. Sondaı-aq ár balaǵa eseptelgen qarajat týraly derekterdi ata-analar egov.kz portalyndaǵy jeke kabınetine kirip, teksere alady.
18 jasqa 2024 jyly tolatyn azamattar nysanaly jınaqtaý shotyna túsken qarjysyn BJZQ-nyń ınternet resýrsyndaǵy jeke kabıneti jáne «elektrondyq úkimet» veb-portaly arqyly óz betterinshe teksere alady. Balalardyń jasy jáne respýblıka óńirleri bólinisi boıynsha jasalǵan esepteýlerge qatysty statıstıkalyq esepter BJZQ resmı saıtynda ornalastyrylǵan.
