Mańǵystaýlyqtar «Kórisý kúni» dep aıryqsha kútip, tań atysymen qol alysyp, qushaq aıqastyra kórisetin mereke jyldaǵy qalypqa saı bıyl da Mańǵystaýdaǵy eń bıik núkte – Otpan taýda atalyp ótti. Taýdyń shyńynda 37 metrlik Adaı ata jáne onyń eki uly Qudaıke men Kelimberdiniń qurmetine qoıylǵan eki munara stelasy bar. 2007 jyly ashylǵan «Otpan taý» tarıhı-mádenı kesheninde ár jyl saıyn Kórisý kúni merekelik is-shara uıymdastyrylyp, «Birlik oty» jaǵyldy.
Bıyl Kórisý kúni «Amal – Alashqa ortaq mereke» ataýymen keń kólemde toılandy. Mańǵystaýlyqtar Memleket basshysy Q.Toqaevtyń «Áz-Naýryzdyń bastaýy – Amal kúni qutty bolsyn! Bul – halqymyzdyń ejelgi ádet-ǵurpyn jańǵyrtyp, tól mádenıetimizdiń ajyramas bóligine aınalǵan biregeı dástúrimiz. Osy kúni ulttyq bolmysymyz ben qundylyqtarymyz erekshe dáripteledi. El yrysy kóbeıe bersin! Jyl jaqsylyǵymen kelsin!» degen quttyqtaýyn qýana qabyldady.
Merekede О́zbekstan Respýblıkasynyń eńbek sińirgen mádenıet salasynyń qyzmetkeri, jyrshy, óner salasynyń magıstri Mahammad Eshboev, Túrkııa Respýblıkasynyń Bishkektegi «Qyrǵyz, Túrik, Manas» ýnıversıtetiniń oqytýshysy, professor Irfan Górdal bastaǵan qonaqtar óz ónerlerin ortaǵa salyp, aǵaıynǵa aq tilegin arnady. Tek Otpan taýda emes, Kórisý kúniniń izgi is-sharalary Aqtaý qalasynda, aýdandarda jalǵasyn taýyp jatty. Shyń basyndaǵy toı 13 naýryz kúni «Birlik otyn» jaǵý rásimimen bastaldy.
– Mańǵystaýdyń eń bıik shyńynda ot jaǵý dástúri tarıhtyń tereńinen bastaý alady. Ot jaǵý birlikti bildiredi jáne uıymshyldyqtyń belgisi. Rýlarǵa, júzderge, ulttarǵa bólinbesten, biz bárimiz ortaq Otanymyzǵa adal qyzmet etemiz. Ǵasyrlar boıy bul kún tereń rýhanı maǵynaǵa ıe boldy. Bizdiń ata-babalarymyz ótken qysta otbasy men qystan aman shyqqanyna qýandy, búgin biz bir-birimizdi kóktemniń bastalýymen quttyqtaımyz, renishterimizdi keshiremiz jáne kúndelikti qarbalasta jaqyndarymyzǵa ýaqyt tabamyz degen nıetpen. Urpaqtar sabaqtastyǵy ornaıdy, biraq «Kórisý kúni» kóktemniń jaqyndap kele jatqanyn jáne jańa úmitter men múmkindikterdiń paıda bolýyn eske salyp qala beredi. Bul mereke barshańyzdyń júregińizdi jylýlyq pen qýanyshqa toltyrsyn! Sizderge baqyt, jaqsylyq jáne amandyq tileımin!
– Búgin Aqtaý qalasyndaǵy «Dostyq úıinde» halqymyzdyń jasampazdyǵy men ilgeri jyljýyna kedergi keltiretin jaǵdaılardy qalaı joıamyz degen oı-talqyǵa qurylǵan respýblıkalyq deńgeıdegi aýqymdy konferensııa ótti. Sonyń jalǵasy retinde «Birlik oty» jaǵyldy. Bárimizdiń birlikte bolýymyz mańyzdy ekeni belgili. Memleket basshysy Joldaýlarynda eldiń damýy úshin birlik, turaqtylyq kerek ekenin aıtýdan jalyqqan emes. Ol úshin yntymaǵymyzdy joǵaltpaýymyz qajet. Amal – barshamyzdy biriktiretin mereke bolsyn. Mereke qutty bolsyn, keregemiz keń, shańyraǵymyz bıik bolsyn, – dedi aımaq basshysy N.Noǵaev.
N.Noǵaev aıtqandaı, Amal toıy aıasynda Mádenıet jáne aqparat mınıstrliginiń etnosaralyq qatynastardy damytý komıtetiniń tóraǵasy Ǵalym Shoıkın, jeńil atletıkadan KSRO-nyń eńbek sińirgen sport sheberi Ámın Tuıaqov, jazýshy Kamal Álpeıisova men Majarstandaǵy «Abaı» mádenı ortalyǵynyń tóraǵasy, tanymal túrkitanýshy ǵalym Ishtvan Qońyr Mandokıdiń zaıyby Ońaısha Mandokı syndy rýhanııat ókilderi, Astana, Almaty, Shymkent qalalary men basqa oblystan kelgen óńirlik aqsaqaldar keńesiniń músheleri jıylyp, halqymyzdy otbasy qundylyqtaryn dáripteýge, elimizdegi birlikti saqtaýǵa shaqyrǵan úndeý joldady.
Amal tańy aldyndaǵy keshte Otpan sahnasynda Qazaqstannyń halyq ártisi Roza Rymbaeva óńir turǵyndary men qonaqtaryn merekemen quttyqtap, ánnen shashý shashty. Sheteldik qonaq jyrshylardyń, jergilikti ónerpazdardyń qatysýymen jyrshylar baıqaýy ótkizilip, jazba aqyndar ózara básekege tústi.
Toı «Sálem – sózdiń atasy» atty teatrlandyrylǵan qoıylym, aýdandyq jáne qalalyq shyǵarmashylyq ujymdardyń konserttik baǵdarlamasy, at, qumaı tazylar jarysy, ózge de sporttyq is-sharalarmen jalǵasty.
Bıylǵy is-sharany uıymdastyrǵan Muńal ata urpaqtary kelesi jyly Amaldy toılaýdy uıymdastyrý estafetasyn Qosaı ata urpaqtaryna tabystady.
Mańǵystaý oblysy
