Mereke aıasynda kezinde sharýashylyqtyń irgesin qalasqan aýyldyń qadirli aqsaqaldaryna syı-qurmet kórsetilip, tórden oryn berildi. Seriktestik basshysy Erkin Buqanov elge, eńbek ardagerlerine izgi lebizin arnap, on shaqty zeınetkerge Meńdiqara shıpajaıyna tegin joldama tabys etti.
Asyl tuqymdy mal sharýashylyǵymen qatar, elıtaly bıdaı tuqymyn ósirýmen dańqy shyqqan iri sharýashylyq Naýryz merekesi qarsańynda aýyl mektebiniń kompıýterlik synyby men balabaqshadaǵy oıyn bólmesin jańartyp berip otyr. Aýyldyń áleýmettik ınfraqurylymynyń damýyna jyl saıyn qarjy quıyp otyrǵan «Qarqyn» agrofırmasyn jyl boıy qaıyrymdylyqpen aınalysady desek, qatelespeımiz. Máselen, qazaq-orys synyby aralas aýyl mektebinde búginde 180-ge jýyq bala oqyp jatyr.
– Qazir oqýshylardyń mektepte ishetin ystyq tamaǵyna deıin seriktestik qarjy bólip otyr. Taıaýda Erkin Saıranuly mektep oqýshylaryna 1,5 mln teńgege IT-kabınet syılady. Bul synypta 11 kompıýter, 1 noýtbýk, prınter bar. Kabınet tolyqtaı veb-kamera men ınternetpen qamtylǵan. Seriktestik óz qarjysyna jyl saıyn mektepti jóndeýden ótkizip otyrady. Sport zalymyzdyń tóbesin jóndep, búkil esikterdi jańartyp berdi. Qysqy maýsymda mektep ǵımaratyn jylytatyn otyn túsirip beredi. Búgin, mine, Kórisý kúnine oraı kópbalaly otbasynda tárbıelenip jatqan 20 shaqty balaǵa merekelik bazarlyq úlestirip berdi. Mektepte balalardy qazaqtyń dástúrli mádenıeti men ulttyq mýzykasyna tárbıeleıtin «Jetigen» synyby jumys isteıdi. Bul da – osy «Qarqyn» seriktestiginiń basshysy Erkin Saıranulynyń qarjylaı qoldaýymen qolǵa alynyp otyrǵan joba, – deıdi mektep dırektory Jandos Keńesbaev.
Aýyldyń balabaqshasy men mádenıet úıi de – seriktestiktiń menshiginde. Ishi-syrty kelisken, alystan kóz tartyp, aýyldyń ajaryn ashyp turǵan bul eki ǵımarat ta búginde el ıgiligine qyzmet etip jatyr. Aýyl balabaqshasynda eki top bar. Birinshisi balalarǵa qazaq tilinde, ekinshisi orys tilinde tárbıe beredi. Sábılerdiń barlyǵy tegin tamaqtanady. Balabaqshaǵa kerekti tósek-oryn, tósenish, ydys aıaq, oqý-tárbıe, oıyn quraldarynyń bárin agrofırma taýyp berip otyr.
– «Qarqynda» shırek ǵasyrǵa jýyq eńbek ettim. Qazir zeınetkermin, Qostanaıda turamyn. Erkin balamyz Naýryz merekesine oraı, arnaıy kólik jibertip, jastarǵa bata berińiz degen soń, arnaıy kelip otyrmyn. Kezinde osy aýyldyń bir kirpishin qulatpaı aman saqtap qalǵan Saıran Balkenulymen birge jumys istedik. О́tpeli kezeńniń ystyq-sýyǵyna tózdik. Halqymyz «Áke kórgen oq jonar» degen máteldi beker aıtpaǵan, men búgin Erkinge óte rızamyn. «Igere bilmegen jerdi jamandaıdy, basqara bilmegen eldi jamandaıdy» degen jaman ataqqa qaldyrmaı, ákesi amanat etip qaldyrǵan Qarqyndy kóterip, eldiń de kóńilin taýyp, jaǵdaıyn jasap berip, ári qaraı damytyp jatyr. Aýyldyń búgingi berekeli turmys-tirshiligi kóńil qýantady», deıdi eńbek ardageri Qydyrkesh Jolmaǵambetov.
Mádenıet úıinde ótken saltanatty is-sharadan keıin, túrli ult ókilderiniń otaýy tigilgen aýyldyń ortalyq kóshesinde Kórisý merekesi bastaldy. Otaý-otaýdy aralaǵan aýyl turǵyndary Naýryz dastarqanynan dám tatyp, qushaqtasyp kórisip, tós qaǵystyryp, bir-birine peıil bildirisip jatty.
Qostanaı oblysy,
Meńdiqara aýdany,
Qarqyn aýyly
