Sýretti túsirgen – Aleksandr MARChENKO
Birden aıtaıyq, óndiriske qajetti shıkizatty shetelden satyp alady. Arnaıy qospany «Hyundai», «Kia» kólikteri úshin Nıderland pen Ońtústik Koreıadan ákeledi. Olardyń ókili kásiporynda jarty jylda bir bolyp turady. Sapasyn salystyrady, synamalardy tekseredi. Sheteldik sarapshylar keı jaǵdaıda keıbir synama túrin Ońtústik Koreıaǵa jiberedi. Qysqasy, sapaǵa qatty kóńil bólinedi.
Zaýyttaǵy «Hyundai», «Kia» markaly sý jańa kólikterge «Protec» brendiniń antıfrızin quıady. Munymen qosa, Sarandaǵy «QazTehna» zaýytynan shyǵatyn YUTONG avtobýstaryna osy suıyqtyq qoldanylady. Qostanaıdaǵy kólik qurastyratyn «SaryarqaAvtoProm» JShS-men de seriktes.
«Biz kóbine tenderge qatysamyz. «Qazaqstan temir joly», «Qazposhta» sekildi irgeli uıymdarmen jumys isteımiz. Qazir qytaılyq «CNPC» kompanııasymen kelissóz júrgizip jatyrmyz. Kelesi jyly ónimdi olarǵa da jetkizip qalýymyz múmkin. О́ıtkeni ónimderimizdiń sapasyn joǵary baǵalap otyr. Jalpy, antıfrızimiz sheteldik kólikterde turaqty qoldanylyp keledi. Biz ISO 9001:2015 sapa menedjmenti júıesin engizdik», deıdi kásiporyn dırektory Svetlana Sorokoletova.
Qaraǵandydan shyǵatyn antıfrızder byltyrdan bastap О́zbekstan men Reseıge eksporttalady. Endigi jospar – Qytaı naryǵy.
Kásiporynda sapany baqylaıtyn zerthana men ǵylymı-zertteý ortalyǵy bar. Onda shıkizat ta, daıyn ónim de zertteledi. Antıfrız sýynyń synamasy aıyna bir ret zerthanadan ótedi. «Bizdiń hımık-tehnolog, byltyr doktorantýrany bitirdi. Ońtústik Koreıaǵa baryp, tájirıbe almasyp keldi», deıdi kásiporyn basshysy.
Kásiporynnan jeńil kólikterge, júk jáne aýyl sharýashylyǵy tehnıkalaryna arnalǵan 12 túrli ónim shyǵady. Antıfrız 200 lıtrlik bóshke men túrli kólemdegi qutylarǵa quıylyp satylady. О́nimniń syrtynda QR kod bar. Sol arqyly kásiporynnyń saıtyna ótip, kóligińizdiń markasyn tańdasańyz, qandaı antıfrız quıý qajettigi jóninde keńes alasyz.
Zaýyt jabdyǵynyń kóp bóligi – otandyq ónimder. Eýropa men Reseıden tek arnaıy sorǵylar alynǵan. Baǵdarlamalyq júıe de solardiki. Búginde kásiporynnyń aıyna 160 tonna ónim shyǵaratyn qýaty bar. Naryqty jaýlaı bastaǵan Qaraǵandynyń antıfrızine suranys kún ótken saıyn artyp keledi. Sol sebepti, kásiporyndy modernızasııalaý qolǵa alyna bastady. Endi tórt tonnalyq konteınerler keledi. Zaýytty jańa qurylǵy, jabdyqtarmen jańartý jumystary jolǵa qoıylyp jatyr.
– Túngi aýysymmen jumys isteýge bolady. Biraq ol qıyn, qatelesip ketýi múmkin. Sondyqtan durysy – jumysker sanyn artyrý. Onda bir aýysymda 12 tonnaǵa deıin ónim óndiremiz. Kásiporyn birtindep avtomattandyrylyp kele jatyr. Jumystyń kóp bóligin kompıýter arqyly atqaramyz. Qandaı qospa qosý kerek, qansha mólsherde, onyń bári baǵdarlamalyq júıemen júzege asady, – deıdi dırektor.
Atalǵan kásiporyn alǵashqyda «Rosneft» kásipornynyń ónimderin satqan. Keıin ózderi shyǵarýdy oılastyrady. Ol kezde Hyundai jáne Kia kólikterine quıatyn elimizde antıfrız joq edi. Sol sebepti, zaýyt basshylyǵy Koreı óndirýshilerine shyǵyp, kelisim alǵan. Kásiporyn «Damu» kásipkerlikti damytý qorynyń kómegimen zaýyt qurylǵylaryn jańartyp qoıypty.
Qazir onda 40-qa jýyq adam jumys isteıdi. О́skemen men Almaty qalasynda fılıaldary bar. Astanadan da ashýdy josparlap júr. Endigi oılary – shetelden qospa tasyǵansha, onyń da óndirisine kirisý. Bul sharýaǵa da bilek sybana kirisip ketti. Jaqyn arada ózderi ázirlegen qospa arqyly eki ónimdi shyǵaryp kórmek. Alǵashqysy synaqtan sátti ótipti.
Kásiporynnyń antıfrız suıyqtyǵyn naryqqa shyǵarǵanyna bıyl bes jyl toldy. Ishki qajettilikti de qamtyp, syrtqy tutynýshylardyń da suranysyna ıe bolyp jatyr. Kólik ıeleri sapasyna da, baǵasyna da rıza. Kásiporynnyń o bastan kózdegeni de osy edi.
Qaraǵandy oblysy
