Foto: Almaty-akshamy.kz
Sán saltanaty jarasqan qatysýshylardy atap ótsek, otaý qurǵandaryna 50 jyl tolǵan «Altyn toı» ıeleri Aqjar aýylynyń turǵyndary Beısenbaı Qasenov pen Sábıra Áshimuhanbetova, Qabanbaı aýylynyń turǵyndary Seıithan Imajanov pen Baqtykamal Eleýsizovalar kórermen yqylasyna ıe boldy. Shańyraq kótergenderine 25 jyl tolǵan «Kúmis toı» ıeleri Ermek Iskakov pen Botakóz Aldakenova, Dáýren Tóleýbaev pen Aınash Kazretova, Jańalyq aýylynyń turǵyndary Sarymbaev Suńǵat pen Kajenova Baljan, sondaı-aq úılengenderine 20 jyl tolǵan «Farfor toı» ıeleri Baqytjan Eginbaev pen Dınara Eginbaevalar da boıda bar qazaqy ónerlerin ortaǵa saldy.
Áýelde qatysýshylardyń otbasyndaǵy jetistikteri úlken ekrannan beınebaıan arqyly kórsetildi. «Altyn toı» ıelerine 50 jyl burynǵy ótken ómirlerin eske salyp, qyzyqty suraqtar qoıyldy. Máselen, ol kezde qyzdy aıttyryp barǵanda syrǵa salý, «máhr» suraý sekildi dástúrler boldy ma degen júrgizýshi suraǵyna tosylyp qalǵandar da boldy. Mundaı suraq astary qazaqylyǵymyzdan ajyramaý, dástúrden adaspaýdy da maqsat etken. «Altyn toı» ıeleri jastarǵa baqytty bolýdyń syryn aıtyp, birde kúldirse, birde tereń oıǵa batyrdy. Aq batalaryn, júrekjardy tilekterin aıtty. Úlgili otbasylar baıqaýda jeńisten buryn tárbıelik máni zor áńgimeler aıtýǵa tyrysty.
– Atalaryńmen otasqanymyzǵa elý jyldan asty. Otbasy bolǵan soń ómirdiń ystyǵy men sýyǵyn birge kórý kerek. Iá, ydys-aıaq syldyrlamaı turmaıdy. Ondaıda keshirimdi bolý kerek. Túsinistik tanytý kerek. Onyń bári – usaq-túıek. Eń bastysy, urpaq amandyǵyn tileımiz. Ultyn, elin súıetin urpaqtyń ǵumyr jastary uzaq bolsa deımin. Sanaly urpaq, sapaly bilim bolsa, el erteńi jarqyn – deıdi Sábıra Áshimuhanbetova.
Aıta keteıik, Beısenbaı ata 29 jyl Abaı atyndaǵy orta mektebinde dırektordyń sharýashylyq jónindegi orynbasary qyzmetinde bolyp, qurmetti zeınet demalysyna shyqqan. Sabıra áje Aqjardaǵy aýylsharýashylyq kolledjinde 30 jyldan asa ýaqyt tárbıeshi qyzmetinde bolyp, qurmetti demalysqa shyqqan. Ekeýi úsh ul tárbıelep ósirip, olardan 6 nemere súıip otyrǵan ata men áje. Ekeýi 2020-2021 jyldary «Aýdannyń áleýmettik ekonomıkasyn damytýǵa qosqan úlesi úshin» tósbelgisimen marapattalǵan. Sondaı-aq osydan jeti jyl buryn qurylǵan Tarbaǵataı ardagerler án-bı ansambliniń negizin qalaýshylar da – Beısenbaı ata men Sábıra áje. Uldary Aıdyn – osy ansambldyń kórkemdik jetekshisi. Sabıra Áshimuhanbetova kúni keshe «Men áıelmin, álemniń anasymyn» atty oblystyq baıqaýǵa qatysyp, bas júldeni jeńip aldy.
Is-shara sońynda AHAT bóliminiń basshysy ári osy is-sharanyń uıymdastyrýshysy Gúljan Qaltaeva mahabbattary jarasym tapqan «Altyn toı», «Kúmis toı» ıelerine saltanatty túrde aýdannyń qurmet kitabyna qol qoıdyryp, tirkeý rásimin júrgizdi. Barlyǵy mereıtoı ıelerin quttyqtap, jyly lebizderin bildirdi.
Shyǵys Qazaqstan oblysy,
Tarbaǵataı aýdany
