Búginde elimizde saraptamalyq-analıtıkalyq salany damytý úshin Senatta júıeli jumys júrgizilip keledi. «Taldau Talks» platformasy osy keshendi istiń laıyqty jalǵasy ekenin atap ótken jón. Jańa alań Senat janyndaǵy Jas sarapshylar klýbynyń múshelerin jáne Taldaý mektebiniń tálimgerleri men túlekterin biriktiredi. Platformanyń negizgi mindeti – jahandyq máselelerdi taldaý jáne salalyq halyqaralyq sarapshylardy tarta otyryp, olardy sheshýdiń tıimdi joldaryn ázirleý.
«Taldau Talks»-tyń alǵashqy otyrysynda Ortalyq Azııa elderiniń saıası jáne áleýmettik-ekonomıkalyq damýyna qatysty máseleler talqylandy. Atap aıtqanda, halyqaralyq sýbektiliktiń ósýi jáne óńirdegi memleketterdiń halyqaralyq qatynastarǵa yqpaly keńinen sóz boldy.
Senat tóraǵasy óz sózinde Ortalyq Azııa elderiniń ózara yntymaqtastyǵynyń perspektıvalyq baǵyttaryna, onyń ishinde saýda-sattyqty keńeıtý jáne jahandyq úderisterge baılanysty óńirlik kún tártibin qalyptastyrýǵa múmkindik beretin ınvestısııalyq jobalardy iske asyrý máselelerine toqtaldy.
Sonymen qatar kezdesýde sarapshylar klımattyń ózgerýine jáne sý resýrstarynyń tapshylyǵyna baılanysty óńirde týyndaǵan syn-qaterlerge nazar aýdardy. Máýlen Áshimbaevtyń aıtýynsha, mundaı túıtkildi sheshý jolynda barlyq taraptyń ortaq iske kúsh jumyldyrýy jáne beıbitshilik pen turaqtylyqty saqtaýdy negizge ala otyryp áreket etýi asa mańyzdy.
Is-shara kezinde Frederık Starr búginde Ortalyq Azııa aımaǵynda bolyp jatqan serpindi jáne eleýli ózgeristerge toqtaldy. Ǵalym olardyń ishinde saıası reformalardyń iske asyrylý barysyna jáne elderdiń áleýmettik-ekonomıkalyq kún tártibine erekshe nazar aýdardy.
Jańa platformanyń otyrysyna Jas sarapshylar klýbynyń músheleri, Taldaý mektebiniń túlekteri men tálimgerleri jáne basqa da analıtıkalyq ınstıtýttar men ortalyqtardyń ókilderi belsendi qatysyp, talqylanǵan taqyryp jóninde óz pikirlerin bildirdi.
