Foto: ixbt.com
Polısııa «Sergek» baqylaý kameralary, ázirge, kóliktiń sary túsinen ótý faktilerin tirkemeıtinin aıtty. Alaıda jol-patrýldik polısııasy mundaı áreketti baıqasa, aıyppul salýǵa quqyly. Aldaǵy ýaqytta baǵdarshamnyń sary túsinen ótý jaǵdaılaryn tirkeıtin pılottyq joba engizilýi múmkin.
«Qazaqstan Respýblıkasy Jol qozǵalysy erejesiniń 5-taraýy 24-tarmaǵy 3) tarmaqshasyna sáıkes baǵdarshamnyń sary túsi janǵanda qozǵalysqa tyıym salatynyn esterińizge salamyz. Sondyqtan bul quqyq buzýshylyq polıseılerdiń nazaryna ilikse, júrgizýshi baǵdarshamnyń tyıym salatyn túsine ótkeni úshin jaýapkershilikke tartylýy múmkin», dedi Almaty polısııa departamentiniń baspasóz qyzmeti.
Qazirgi ýaqytta «Sergek» baqylaý kameralary mynadaı zańbuzýshylyqtardy tirkeýge qaýqarly:
- jyldamdyqty asyrý;
- tutas syzyqty kesip ótý;
- qosarlanǵan tutas syzyqty kesip, keri aınalý;
- belgilenbegen jerde turý/toqtaý;
- baǵdarshamnyń tyıym salynǵan túsine ótý.
Almaty qalalyq departamenti pılottyq joba negizinde qaýipsizdik beldikterin taqpaý jáne jaıaý júrginshiler ótkelinde jaıaý júrginshilerdi ótkizbeý derekterin «Sergek» baqylaý kameralary tirkep, aıyppul jazylatynyn eske saldy.
