Foto: astana-akshamy.kz
Elordada áz-Naýryz merekesine oraı «Armandar shańyraǵy» atty áleýmettik aksııa ótti. Nura aýdany ákimdigi uıymdastyrǵan ıgi is-sharada «Jansaıa» áleýmettik qyzmet kórsetý ortalyǵyna baratyn balalar armandaryn aq qaǵazǵa jazdy. Kópbalaly ana Sandýǵash Nurseıitovanyń kenje balasy qazirgi kezde osy ortalyqta ońaltýdan ótip júr.
«Ulym Estaı – jeti jasta. Balamnyń sóıleý qabileti kesh damyp jatyr. Bul ortalyq bizge unaıdy. Munda bizben kún saıyn logoped, psıholog sekildi mamandar jumys isteıdi. Ortalyqtyń áleýmettik qyzmetkerleri balalarǵa jaqsy qaraıdy. Búgin keremet aksııa ótkizilip jatyr. Erekshe balalardy elep, eskerip jatqany úshin uıymdastyrýshylarǵa alǵysym sheksiz. Biz úı jaǵdaıynda qoıylǵan batýt bolmasa, 2 dóńgelekti velosıped surap otyrmyz», dedi anasy.
Is-sharanyń bar maqsaty balalarǵa qýanysh syılaý eken. «Jerde bir bala qýansa, kókte myń perishte shattanady» deıdi halqymyz. Rasynda balanyń qýanyshynan asqan shattyq bar ma, táıiri. Mine, osyndaı ıgi iske umtylǵan elordalyq mesenattar men kásipkerler Nura aýdanyna qarasty 70 balanyń armanyn oryndaýǵa shyn nıetimen kirisip otyr. Olar balalar armandaǵan syılyqtardy 21 naýryzda tabystap, merekeniń shyraıyn asha túspek.
«Astana qalasy ákimdiginiń «Jansaıa» áleýmettik qyzmet kórsetý ortalyǵy 2022 jyly ashylǵan. Munda qazirgi kezde 1,5 jastan 18 jasqa deıingi 640 múmkindigi shekteýli bala bar. Kún saıyn 70-ten asa bala ońaltýdan ótedi. Olar ártúrli mamandardyń qyzmetin alady. Sondaı-aq ortalyqta bı, vokal sekildi úıirmeler jumys isteıdi», deıdi ortalyqtyń dırektory Erdáýlet Amanbaı.
Igilikti is tek materıaldan turmasa kerek-ti. Tipti qol kómektiń ózi – izgi qoǵamnyń negizgi ustyndarynyń biri. Astana jurtshylyǵy budan da kende emes. Igi ister marafony aıasynda elordalyq eriktiler jalǵyz turatyn zeınetkerlerdiń aýlasyn tazalap, qaryn kúrep, qarııalardyń alǵysyna bólendi.
«Balalarǵa alǵysym sheksiz. Olardyń kómegine rızamyn. Jas kelip, boıdan qaırat ketken soń, qolǵa kúrek alyp aýlanyń qaryn kúreý de ońaı emes. Al myna kómekke kelgen jastar meni bir tyǵyryqtan alyp shyǵaıyn dep tur», dep Valentına Sergıenko aǵynan jaryldy.
Máselen, Baıqońyr aýdanynda qaıyrymdylyq aksııasy aıasynda 20-ǵa jýyq belsendi jas jalǵyzilik qart adamdardyń otymen kirip, qarymen shyǵyp júr. Sebebi kún jylynǵannan keıin qar erip, áýrege salatyny bar. Al elordalyq eriktiler qystaı jaýǵan aýlanyń qaryn kommýnaldyq qyzmetter alyp ketetin jerge ońtaılap qoıdy.
2021 jyldan beri «Astana jastary» eriktileriniń qatarynda atsalysyp júrgen Maks Altaev esimdi jas jigittiń aıtýynsha, bul – jylda bolatyn dástúrli izgi isterdiń biri. Onyń aıtýynsha, «Astana jastary» belsendileri qalany táýlik boıy qardan tazartatyn kommýnaldyq qyzmet mamandaryna da kómek qolyn sozyp júr. Eriktiler ystyq shaı men baýyrsaq taratý aksııalaryn jıi ótkizedi. Mundaı qaıyrymdy jastar barda qoǵamǵa jylý, kóńilge senim uıalaıdy.
